वीरगञ्ज। सामुदायिक प्रहरी साझेदारी कार्यक्रमअन्तर्गत आज (शुक्रबार, जुलाई ४, २०२५) वीरगञ्ज महानगरपालिकाको वडा नम्बर १६ स्थित रजत जयन्ती चोकदेखि बाइपास रोड हुँदै वैष्णवी मन्दिर चोकसम्म वृहत् वृक्षारोपण कार्यक्रम सम्पन्न भएको छ। यस कार्यक्रममा विभिन्न किसिमका ४०० बिरुवा रोपिएका छन्।
यो कार्यक्रम वीरगञ्ज महानगरपालिका कार्यालय, राष्ट्रपति चुरे तराई मधेश संरक्षण विकास समिति (भरतपुर, चितवन) र ग्रीन सिटी सामुदायिक प्रहरी सेवा केन्द्र (आदर्शनगर, वीरगञ्ज पर्सा) को संयुक्त आयोजनामा भएको थियो।
कार्यक्रमका प्रमुख अतिथि वीरगञ्ज महानगरपालिकाका नगर प्रमुख राजेशमान सिंह रहनुभएको थियो। ग्रीन सिटी सामुदायिक सेवा केन्द्रका अध्यक्ष जय प्रकाश खेतानको अध्यक्षतामा सम्पन्न भएको उक्त कार्यक्रममा प्रमुख सेनानी निराजन कटुवाल, सशस्त्र प्रहरी उपरीक्षक राधेश्याम धिमाल, व्यवस्थित वीरगञ्ज अभियान संयोजकका अध्यक्ष दिलीप राज कार्की, प्रमुख भन्सार अधिकृत रामप्रसाद पाठक, भन्सार अधिकृत सुनिता पौडेल लगायतका विशिष्ट व्यक्तिहरूको उपस्थिति रहेको थियो।
