चितवन। भरतपुर महानगरपालिकाले मागमा आधारित सीपमूलक तालिममा सहभागी ७७९ जना प्रशिक्षार्थीलाई प्रमाणपत्र वितरण गरेको छ। बिहीबार महानगरले विभिन्न सीप क्षेत्रमा तालिम लिएका प्रशिक्षार्थीहरूलाई औपचारिक रूपमा प्रमाणपत्र प्रदान गरेको हो।
महानगरपालिकाले स्थानीय श्रम बजारको माग र दक्ष जनशक्तिको आवश्यकतालाई ध्यानमा राख्दै मेसन (ढलान र निर्माण), वारिष्टा (कफी तथा पेय पदार्थ तयार गर्ने), ड्राइभिङ, र एडभान्स ब्युटीपार्लर तालिम सञ्चालन गरेको थियो। तालिम समापन समारोहमा महानगर प्रमुख रेनु दाहाल, उपप्रमुख चित्रसेन अधिकारी र प्रमुख प्रशासकीय अधिकृत लक्ष्मीप्रसाद पौडेलले संयुक्त रूपमा प्रशिक्षार्थीहरूलाई प्रमाणपत्र वितरण गरे।
रोजगारी सिर्जना र आत्मनिर्भरतामा जोड
महानगर प्रमुख दाहालले सीप विकासमार्फत रोजगारी सिर्जना गर्दै आत्मनिर्भर नगर बनाउने उद्देश्यले तालिम आयोजना गरिएको बताइन्। उनले भरतपुर महानगर भविष्यमा पनि यस्ता तालिमलाई प्राथमिकतामा राख्दै युवालाई स्वरोजगारतर्फ प्रेरित गर्ने प्रतिबद्धता व्यक्त गरिन्। प्रमुख दाहालले तालिममा लिएको ज्ञान सीपमार्फत उद्योग, व्यवसाय तथा रोजगार बन्न प्रशिक्षार्थीलाई आग्रह पनि गरिन्। दक्ष जनशक्तिको माग स्वदेश तथा विदेशमा समेत रहेकाले सीप सिकेपछि राम्रो आम्दानी गर्न सकिने उनको भनाइ थियो।
यस्तै, उपप्रमुख चित्रसेन अधिकारीले महानगरले युवाहरूलाई लक्षित गरी वर्षेनी यस्ता तालिमहरू प्रदान गर्दै आएको जानकारी दिए। चालु आर्थिक वर्षका लागि सीप विकास कार्यक्रममा रु १ करोड ५० लाख विनियोजन गरिएको र सोही बजेटबाट १७ सय जनालाई तालिम दिइएको उनको भनाइ थियो। प्रमुख प्रशासकीय अधिकृत पौडेलले स्थानीयस्तरमै रोजगारी सिर्जना गर्न सकिने यस्ता कार्यक्रमहरूलाई अझ प्रभावकारी बनाइने जानकारी दिए।
कार्यक्रममा प्रशिक्षार्थीहरूले प्राप्त तालिमले आफूहरूलाई व्यावसायिक जीवनमा अघि बढ्न मद्दत गर्ने विश्वास व्यक्त गरे। तालिममा सहभागीहरूमध्ये अधिकांश युवा, महिला तथा बेरोजगार व्यक्तिहरू रहेका थिए।
