विराटनगर। विराटनगरमा एक जीवित व्यक्तिलाई मृत घोषणा गरेर नक्कली कागजातमार्फत जग्गा हडपिएको घटना सार्वजनिक भएको छ। विराटनगर–११, पिचरा टोलका ७० वर्षीय केदारबहादुर बस्नेतको नाममा झुटो सर्जिमिन मुचुल्का तयार पारी २०५८ सालमै उनको मृत्यु भएको देखाइएको र त्यसकै आधारमा उनका नाममा रहेको जग्गा गैरकानुनीरूपमा नामसारी गरिएको पाइएको हो।
यस प्रकरणमा विराटनगर महानगरपालिकाका तत्कालीन वडाध्यक्षको समेत मिलेमतो देखिएको छ। पीडित बस्नेतले मोरङ जिल्ला अदालतमा तत्कालीन वडाध्यक्ष, वडासचिवसहित १० जनाविरुद्ध मुद्दा दायर गरेका छन्। बस्नेतको दाबीअनुसार, विराटनगर–२ का तत्कालीन वडाध्यक्ष कुमार पोखरेल, वडासचिव सूर्यबहादुर थापा र उनका आफ्नै दाजु भरतबहादुर बस्नेत मिलेर फर्जी प्रक्रिया अघि बढाएका थिए।
फिरादपत्रअनुसार, तीन कठ्ठा आठ धुर क्षेत्रफल भएको जग्गा बस्नेतको मृत्यु भएको झुटा विवरण राखेर भरतबहादुरको नाममा दर्ता गरिएको छ। उक्त जग्गा तेस्रो पक्षलाई समेत बिक्री भइसकेको छ। सर्जिमिन प्रक्रिया २०७५ असोज १७ मा गरिएको र त्यसको दुई दिनपछि इनरुवा मालपोत कार्यालयमा नामसारीको सिफारिस पठाइएको थियो। तर, पीडितलाई घटनाको जानकारी २०८२ जेठ ११ गतेमात्र भएको हो।
वडाध्यक्ष पोखरेलले भने आफूले सचिवले तयार पारेको कागजातमा हस्ताक्षर गरेकाले सानो त्रुटि भएको दाबी गरेका छन्। पीडितले मुलुकी अपराध संहिता २०७४ को दफा २७९(३) अनुसार दोषीहरूमाथि हदैसम्मको कैद र जरिवाना माग गर्दै न्यायका लागि अदालतमा मुद्दा दायर गरेका छन्।
यस्ता घटनाहरूले सरकारी कागजातको विश्वसनीयता र सम्पत्ति सुरक्षामा गम्भीर प्रश्न उठाएको छ। यसमा थप अनुसन्धान र कानुनी कारबाही आवश्यक देखिन्छ।
