वीरगन्ज। वीरगन्जमा सडक सुरक्षा र ट्राफिक व्यवस्थापनका विषयमा सरोकारवालाहरूले आ-आफ्नो धारणा व्यक्त गर्दै यसलाई सबैको सामूहिक दायित्वका रूपमा स्वीकार गर्नुपर्नेमा जोड दिएका छन्।
महानगरपालिकाका प्रमुख राजेशमान सिंहले ट्राफिक नियमको पालना ३६५ दिन नै हुनुपर्ने र ट्राफिक प्रहरीको मात्रै काम नभएको बताए। उनले बसपार्क हुँदाहुँदै जथाभावी यात्रु चढाउने प्रवृत्तिले वीरगन्जप्रति गलत सन्देश गएको औँल्याए। सिंहले घण्टाघरको ट्राफिक लाइट सञ्चालन गर्न, ट्राफिक नियम नमान्ने युवालाई अभिभावक बोलाएर सम्झाउन, र ठूलो ध्वनि भएका मोटरसाइकल चलाउने कलेजका विद्यार्थीलाई कारबाही गर्न आग्रह गरे।
वीरगन्ज महानगरका उपप्रमुख इम्तियाज आलमले सहरमा सचेतना बढी भएपनि गाउँघरसम्म ट्राफिक सचेतना फैलाउनु जरुरी रहेको बताए। उनले ट्राफिक नियम पालना सम्बन्धमा नाटक र सन्देशमूलक सूचना प्रसारण आवश्यक रहेकोमा जोड दिए।
जिल्ला प्रशासन कार्यालय पर्साका निमित्त प्रमुख जिल्ला अधिकारी सुमन कार्कीले नेपालमा प्रत्येक दिन सातजनाको ज्यान जाने गरेको र यसलाई घटाउन सचेतना अपरिहार्य रहेको बताए। उनले सडकलाई सुरक्षित र व्यवस्थित बनाउनु ट्राफिक प्रहरीको मात्रै नभई सबैको दायित्व भएको उल्लेख गरे।
पर्साका प्रहरी उपरीक्षक (एसपी) गौतम मिश्रले सवारी दुर्घटना न्यूनीकरणका लागि चालकको स्वास्थ्य परीक्षण, वृक्षारोपण, र सवारी चेकजाँचजस्ता कार्यक्रम सञ्चालन गरिएको जानकारी दिए। उनले सडक पूर्वाधार, सडक बत्ती, व्यवस्थापनलगायतमा सबै सरोकारवाला निकाय लाग्न आवश्यक रहेको बताए ।
ट्राफिक बत्ती मर्मत भएमा प्रहरी तथा ट्राफिकलाई नियम पालना गराउन सहज हुने बताए। उनले बजारको पार्किङ समस्या समाधानका लागि पहेँलो घेरा लगाएर व्यवस्थापनमा लागेको पनि उल्लेख गरे।
वीरगन्ज महनगरपालिका वडा नम्बर ४ का वडा अध्यक्ष तथा यातायात व्यावसायी संघका प्रतिनिधि जगत साहले ट्राफिक सप्ताहको निरन्तरतामा जोड दिएका छन्।
वीरगञ्जमा जेठ २२ देखि संचालन गरिएको ट्राफिक सप्ताह आज सम्पन्न भएको छ । कार्यत्रममा दुर्घटना न्यूनीकरणका लागि चालकहरूको स्वास्थ्य परीक्षण, वृक्षारोपण र सवारी साधनको चेकजाँच जस्ता कार्यक्रम गरिएको र यसले सवारी दुर्घटना न्यूनीकरणमा पनि सहयोग पुगेको जिल्ला ट्राफिक प्रहरी कार्यालय पर्साका प्रमुख प्रहरी निरीक्षक लोकराज भट्टले जानकारी दिए ।
