वीरगञ्ज। मानवसेवा आश्रम वीरगञ्जले सोमबार राति करिब ८ बजे परवानीपुर चोकबाट एक अन्दाजी ४० वर्षीय बेवारिसे पुरुषको उद्धार गरेको छ। नाम र थर बताउन नसक्ने पुरुषलाई आश्रमले तत्काल उद्धार गरेर सुरक्षित साथ मानव सेवा आश्रममा ल्याएको हो।
उद्धार कार्यमा आश्रमका संस्थापक देवेश गुप्ता, समाजसेवी प्रकाश थारु, स्थानीय समुदाय र प्रहरीको सक्रिय सहभागिता थियो। सबैको सामूहिक प्रयासले उक्त पुरुषलाई आश्रमसम्म सुरक्षित रूपले पुर्याइएको छ।
आश्रममा ल्याइसकेपछि, उनलाई शारीरिक सफाइ र उपचारका लागि डा. भरत कुमार गोइतको निगरानीमा राखिएको छ। मानवसेवा आश्रमले यस्तो बेवारिसे र मानसिक सन्तुलन गुमाएका व्यक्तिहरूलाई सहारा दिँदै, आश्रय र स्वास्थ्य सेवासमेत उपलब्ध गराउँदै आएको छ।
मानवसेवा आश्रम वीरगञ्ज शाखा २०७६ जेठमा स्थापना भएको थियो र त्यसपछि यसले समाजमा सशक्त योगदान दिएको छ। हालसम्म, आश्रमले २ सय ७६ जना बेवारिसे व्यक्तिहरूको उद्धार गरेको छ। यस्ता उद्धार गरिएका व्यक्तिहरूमध्ये ९७ जनाको पारिवारिक पुनर्मिलन पनि गराउन सफल भएको छ।
वर्तमानमा, सिरिसियामा ५७ जना महिला, पुरुष र बालबालिका आश्रित छन्, जसलाई निःशुल्क खाना, बास, स्वास्थ्य सेवा र मानसिक परामर्श उपलब्ध गराइन्छ।
यो आश्रमको काम एक्लै सम्भव नभएको कुरा स्वीकार गर्दै, संस्थाका कार्यकर्ताले स्थानीय प्रशासन, समाजसेवी, स्वास्थ्यकर्मी र सर्वसाधारणको निरन्तर सहयोगको महत्त्वलाई जोड दिएका छन्।
