हेटौंडा । आज बिहानैदेखि अवरुद्ध रहेको हेटौंडा–काठमाडौं जोड्ने कान्ति लोकपथको बगुवा खोला खण्डमा अहिले एकतर्फी सवारी सञ्चालनको व्यवस्था मिलाइएको छ।
मकवानपुरको भीमफेदी गाउँपालिका–८ र बागमती गाउँपालिका–२ स्थित बागमती पुललाई जोड्ने बगुवा खोलामा ह्युमपाइप राखेर बनाइएको डाइभर्सन बगाएपछि सडक अवरुद्ध बनेको थियो।
मर्मतसम्भारपश्चात साना सवारी साधनका लागि एकतर्फी सडक सञ्चालन गरिएको मकवानपुरका प्रहरी नायब उपरीक्षक श्यामु अर्यालले जानकारी दिए। उनका अनुसार, निर्माणाधीन पुलबाट कार, जिप, स्कारपियो र मोटरसाइकललाई एकतर्फी आवतजावतको व्यवस्था मिलाइएको छ।
ठूला सवारी साधनलाई भने डाइभर्सन बाटो निर्माण नहुँदासम्मका लागि आवतजावतमा रोक लगाइएको डिएसपी अर्यालले बताए।
बगुवा खोलास्थित बागमती पुलको एक भाग गत असोजमा आएको बाढीले बगाएको थियो। पुलको मकवानपुरतर्फको भाग बगाएपछि डाइभर्सनबाट सडक सञ्चालन भइरहेको छ। स्थायी सडक संरचना निर्माण नभएसम्म बगुवा खोलामा वर्षाको बेला सडक सञ्चालन नियमित हुने अवस्था देखिँदैन।
