वीरगञ्ज । वीरगञ्ज उद्योग वाणिज्य संघले अघोषित लोडसेडिङ र गुणस्तरहीन विद्युत आपूर्तिको तत्काल अन्त्य गर्न माग गरेको छ। संघका अध्यक्ष हरि गौतमले आज एक विज्ञप्ति जारी गर्दै यसले औद्योगिक क्षेत्रमा गम्भीर असर पारेको भन्दै समस्या समाधानका लागि नेपाल विद्युत प्राधिकरणसँग आग्रह गरेका छन्।
वीरगञ्ज–पथलैया औद्योगिक कोरिडोरका उद्योगहरू नेपाल विद्युत प्राधिकरणले जारी राखेको अघोषित लोडसेडिङ, अनियमित तथा न्यून भोल्टेजको गुणस्तरहीन विद्युत आपूर्तिबाट नराम्ररी प्रभावित भएका छन्। उद्योगीहरूका अनुसार, यसका कारण उत्पादनमा कमी आएको छ र महँगा मेसिनरी उपकरणहरू बिग्रिएर ठूलो नोक्सानी बेहोर्नुपरेको छ।
अघोषित लोडसेडिङका कारण उद्योगहरूको उत्पादन क्षमता घटेको छ भने विद्युत प्रवाहमा हुने निरन्तरको उतारचढाव र ट्रिपिङले औद्योगिक मेसिनरीहरू दैनिक रूपमा बिग्रिने गरेका छन्। यसले उत्पादन लागत बढाएको र अन्तर्राष्ट्रिय बजारमा प्रतिस्पर्धा गर्ने क्षमता समेत गुम्दै गएको उद्योगीहरूको भनाइ छ।
महँगो वैकल्पिक ऊर्जाको प्रयोग सबै उद्योगका लागि सम्भव नभएको उनीहरूले बताएका छन्। २०७५ सालमा औद्योगिक लोडसेडिङ अन्त्य भएको घोषणापछि उत्साहित भएका उद्योगीहरू पुनः ४–५ वर्ष नबित्दै पुरानै समस्या दोहोरिँदा थप चिन्तित भएका छन्।
गुणस्तरीय विद्युत आपूर्तिको अभावमा मेसिनरी उपकरणहरू बिग्रिँदा मर्मत खर्च बढेको, कच्चा पदार्थ खेर गएको र उत्पादनमा समेत कमी आएको छ। यसले उद्योगहरूलाई रुग्णतातिर धकेलिरहेको उद्योगीहरूले बताएका छन्।
उद्योगीहरूले नेपाल विद्युत प्राधिकरणसँग विद्यमान विद्युत आपूर्तिको अवस्थालाई ध्यानमा राखेर लोड व्यवस्थापन गरी नियमित र गुणस्तरीय विद्युत आपूर्ति व्यवस्था मिलाउन माग गरेका छन्। उनीहरूले यो समस्या तत्काल समाधान नगरिए उद्योगहरू धराशायी हुने चेतावनी पनि दिएका छन्।
