वीरगन्ज । उपत्यका भन्दा बाहिर पहिलो पटक कक्षा ११ र १२ मा कानून र पत्रकारिता पठाउने वीरगन्ज कलेजले कक्षा १२ र बीबीएसका विद्यार्थीहरुको विदाई गरेको छ । कलेजले शुक्रबार र शनिबार दुईदिन कक्षा १२ र बीबीएसका विद्यार्थीहरुलाई विदाई गरेको हो । कक्षा १२ का विद्यार्थीहरुलाई शुक्रबार क्लासिक बंक्वेटमा आयोजना गरिएको कार्यक्रममा बिदाई गरिएको हो ।
त्यस्तै बीबीएस चौथो बर्षका विद्यार्थीहरुलाई शनिबार मधुशाला रेष्टुरेण्टमा कार्यक्रमको आयोजना गरेर बिदाई गरेको हो । कलेजका सञ्चालक समिति अध्यक्ष डा.दीपेन्द्र कुमार चौधरीको अध्यक्षतामा भएको दुवै कार्यक्रमको उदघाटन प्रमुख अतिथि वीरगन्ज उद्योग वाणिज्य संघका अध्यक्ष हरि गौतमले गरेका थिए ।
कार्याक्रममा शुभकामना मन्तव्य व्यक्त गर्ने क्रममा प्रमुख अतिथि गौतमले विद्यार्थीहरुले धैर्य गर्न सक्नुपर्ने र अनुशासन कायम गर्नुपर्ने बताए । उनले बीबीएस सम्पन्न गरेर जाने विद्यार्थीहरु अलिकति जिम्मेवारी बहन गर्ने गरी अध्ययनलाई निरन्तरता दिन सुझाव दिए ।
शुक्रबार भएको कार्यक्रममा एशिया पत्रकार महासंघका सहसचिव दीपेन्द्र चौहान, नेपाल पत्रकार महासंघ पर्साका अध्यक्ष ओमप्रकाश खनाल, प्याब्सनका पूर्व केन्द्रीय सदस्य तथा विकोन माविका निर्देशक प्रकश उपाध्याय, विभिन्न सामुदायिक विद्यालयका प्रधानाध्यापकहरु कलेजका फ्याकल्टी मेम्बरहरु तथा सञ्चारकर्मीहरको उपस्थिति रहेको थियो ।
त्यस्तै शनिबार भएको कार्यक्रममा प्याब्सनका पूर्व केन्द्रीय सदस्य प्रकाश उपाध्याय, माउण्ट एडमण्ड माविका निर्देशक फजिल अहमद, प्रेस सेन्टर नेपालका मधेस प्रदेश अध्यक्ष निरज पिठाकोटे मगर लगायतले शुभकामना व्यक्त गरेका थिए । कार्यक्रममा स्वागत मन्तव्य कलेजका प्रशासन प्रमुख सुरेश प्रसाद चौधरीले गरेका थिए ।
शुक्रबारको कार्यक्रममा कलेजका शिक्षक कृष्णा पासवानले गरेका थिए भने शनिबारको कार्यक्रममा बीबीएस दोस्रो बर्षका विद्यार्थीहरुले गरेका थिए । वीरगन्ज कलेजले सरकारले ल्याएको सिक्दै पढ्दै अवधारण अनुसार रात्री बजारको समेत आयोजना गरेर विद्यार्थीहरुलाई उद्यमशीलतामा आकर्षित गर्ने प्रयास गरेको कलेजका अध्यक्ष डा.दीपेन्द्र कुमार चौधरीले बताए । वीरगन्ज कलेजले त्रिभुवन विश्वविद्यालय, राजर्षी जनक विश्वविद्यालय र सूदुरपश्चिम विश्वविद्यालयको कार्यक्रमहरु एकसाथ सञ्चालन गरेको छ ।
