काठमाडौं । नेपालले संयुक्त राष्ट्रसंघका शान्ति मिसनहरूमा आगामी दिनमा १० हजारसम्म शान्ति सैनिक खटाउन तयार रहेको प्रतिबद्धता व्यक्त गरेको छ। जर्मनीको बर्लिनमा वैशाख ३० र ३१ गते भएको ‘यूएन पिसकिपिङ मिनिस्टरियल, २०२५’ मा रक्षामन्त्री मानवीर राईले उक्त प्रतिबद्धता जनाएका हुन्।
रक्षा मन्त्रालयद्वारा शुक्रबार जारी विज्ञप्तिअनुसार, रक्षामन्त्री राईले सन् १९५८ देखि नै नेपालले बिनाकुनै सर्त निरन्तर शान्ति सैनिक खटाउँदै आएको उल्लेख गरे। उनले संयुक्त राष्ट्रसंघको अनुरोधमा नेपाल आगामी दिनमा १० हजारसम्म शान्ति सैनिकहरू खटाउन तयार रहेको र ‘र्यापिड डिप्लोयमेन्ट लेभल वर्कसप’ आयोजना गर्न समेत तयार रहेको बताएका थिए।
सम्मेलनमा नेपाली प्रतिनिधिमण्डलको नेतृत्व गर्दै सहभागी भएका रक्षामन्त्री राईले ८० भन्दा बढी देशका रक्षा तथा परराष्ट्रमन्त्रीहरूको उपस्थितिमा नेपालको तर्फबाट मन्तव्य राखेका थिए। उनले संयुक्त राष्ट्रसंघीय शान्ति मिसनहरूले विश्वका विभिन्न द्वन्द्वग्रस्त मुलुकहरूमा शान्ति, सुरक्षा र मानवीय सहायता सुनिश्चित गर्न महत्त्वपूर्ण भूमिका खेलिरहेको बताए।
आफ्नो सम्बोधनका क्रममा रक्षामन्त्री राईले नेपाली शान्ति सैनिकहरूले विश्व शान्तिमा उल्लेख्य योगदान पुर्याएको दाबी समेत गरे। उनले संयुक्त राष्ट्रसंघीय शान्ति स्थापना कार्यमा नेपालको लामो समयदेखिको अविचलित प्रतिबद्धता रहेको जनाउँदै हाल विभिन्न ११ वटा शान्ति मिसनहरूमा ६ हजारभन्दा बढी नेपाली शान्ति सैनिक खटिएको बताए। शान्ति सेना खटाउने मुलुकहरूमा नेपाल हाल पहिलो स्थानमा रहेको पनि उनले जनाए।
शान्ति स्थापना कार्यअन्तर्गत उच्च नेतृत्व तहमा समेत रही नेपालले काम गर्ने अवसर प्राप्त गर्ने अपेक्षा राखेका रक्षामन्त्री राईले संयुक्त राष्ट्रसंघको नेतृत्वमा शान्ति मिसनहरूको प्रभावकारिता अभिवृद्धिका लागि भइरहेका प्रयासहरूमा नेपालको पूर्ण साथ र सहयोग रहने प्रतिबद्धता जनाए। हाल शान्ति स्थापना कार्यको सुधार र सबलीकरणका लागि भइरहेका प्रयासहरूको उनले सराहना गरे।
शान्ति मिसनहरूमा महिलाहरूलाई सहभागी गराउने विषयलाई नेपालले उच्च महत्त्व र प्राथमिकता दिई कार्यान्वयन गर्दै आएको दाबी गर्दै उनले राष्ट्रसंघीय शान्ति स्थापना कार्यलाई थप बलियो, सुरक्षित र प्रभावकारी बनाउन सबैको सामूहिक प्रयास आवश्यक रहेको बताएका थिए।
