रञ्जित पाण्डेय
वीरगन्ज । बाराको प्रसौनी गाउँपालिका-२ बाट १३ वर्षीय बालक चन्दन मुखिया बिनलाई अपहरण गरी फिरौती माग्ने एक युवकलाई प्रहरीले पक्राउ गरेको छ।
इलाका प्रहरी कार्यालय प्रसौनी बाराका अनुसार आज दिउँसो करिब ४ बजे अशोक मुखिया बिनका छोरा चन्दनलाई अपरिचित व्यक्तिले मोटरसाइकलमा राखेर लगेका थिए। बालकलाई बुबा खेतमा काम गरिरहेको ठाउँ देखाउन जाऔं भन्दै ती व्यक्तिले मोटरसाइकलमा बसालेर तीव्र गतिमा लगेका थिए।
कहीँकतै नरोकी बालकलाई एकान्तमा पुर्याएपछि अपहरणकारीले चन्दनका बुबालाई ९७०१५८८०१६ र ९८४१८१५२६४ नम्बरबाट फोन गरी १० हजार रुपैयाँ फिरौती मागेका थिए।
घटनाको जानकारी पाउनासाथ इलाका प्रहरी कार्यालय प्रसौनी बाराबाट प्रहरी निरीक्षक टुपेन्द्र श्रेष्ठको कमाण्डमा १३ जनाको टोली तत्काल परिचालन गरिएको थियो।
प्रहरी टोलीले खोजी कार्यलाई तीव्र पारेपछि अपहरण भएको करिब पौने चार घण्टापछि राति पौने ८ बजे बालक चन्दन मुखिया बिन र अपहरणमा संलग्न पर्सा जिल्लाको वीरगंज महानगरपालिका-१५ भेडियाही बस्ने ३५ वर्षीय ललन सराफलाई भेडियाही चोकबाट पक्राउ गरेको हो। प्रहरीले बालकलाई सराफको घरबाट सकुशल उद्धार गरेको छ।
हाल दुवै जनालाई इलाका प्रहरी कार्यालय प्रसौनी बारामा राखिएको छ र घटनाबारे थप अनुसन्धान भइरहेको जिल्ला प्रहरी कार्यालय बाराले जनाएको छ ।
