काठमाडौ । प्रधानमन्त्री केपी शर्मा ओलीले सरकारको वार्षिक नीति तथा कार्यक्रममाथिको छलफलका क्रममा सांसदहरूले उठाएका प्रश्नहरूको जवाफ आज दिने भएका छन्। प्रतिनिधिसभाको बैठक बिहान ११ः०० बजे बोलाइएको छ।
संसद् सचिवालयका महासचिव पद्मप्रसाद पाण्डेयका अनुसार, आजको बैठकको सम्भावित कार्यसूचीमा प्रधानमन्त्री ओलीले नीति तथा कार्यक्रममाथि सांसदहरूले राखेका जिज्ञासाहरूको जवाफ दिने कार्यक्रम तय भएको छ।
राष्ट्रपति रामचन्द्र पौडेलले यही वैशाख १९ गते संघीय संसद्को दुवै सदनको संयुक्त बैठकमा आर्थिक वर्ष २०८२–८३ को नेपाल सरकारको वार्षिक नीति तथा कार्यक्रम प्रस्तुत गरेका थिए।
उक्त नीति तथा कार्यक्रममा विभिन्न दल र स्वतन्त्र सांसदहरूले आफ्ना विचार व्यक्त गरेका छन्। प्रतिनिधिसभामा वैशाख २२ गतेदेखि यसमाथि छलफल सुरु भएको थियो। सांसदहरूले नीति तथा कार्यक्रममाथि एकल र संयुक्त गरी कुल ३७ वटा संशोधन प्रस्ताव दर्ता गराएका छन्। प्रधानमन्त्रीको जवाफपछि यी संशोधन प्रस्तावहरूलाई निर्णयार्थ प्रस्तुत गरिने कार्यसूची रहेको छ।
त्यसैगरी, राष्ट्रियसभाको बैठक आज दिउँसो १ः१५ बजे बस्दै छ। त्यहाँ पनि प्रधानमन्त्री ओलीले सरकारको नीति तथा कार्यक्रममाथिको छलफलमा उठेका प्रश्नहरूको जवाफ दिने सम्भावित कार्यसूची तय भएको छ। प्रधानमन्त्रीले जवाफ दिएपछि राष्ट्रियसभामा पेस भएका संशोधन प्रस्तावहरूलाई निर्णयार्थ प्रस्तुत गरी आजै पारित गर्ने कार्यसूची रहेको छ।
