काठमाडौं । प्रधानमन्त्री केपी शर्मा ओलीले कुष्ठरोग निवारणको प्रयासलाई अझ गतिशील र प्रभावकारी बनाउनुपर्नेमा जोड दिएका छन्। स्वास्थ्य तथा जनसङ्ख्या मन्त्रालय र विभिन्न संस्थाद्वारा आज आयोजित ‘नेपाल कुष्ठरोग सम्मेलन’ को उद्घाटन सत्रलाई सम्बोधन गर्दै उनले नेपालमा प्रति १० हजारमा एकभन्दा कम कुष्ठरोगी हुनु सकारात्मक भए पनि रोग पूर्ण रूपमा उन्मूलन नभएसम्म आफूहरू सन्तुष्ट नहुने बताए।
उनले स्वस्थ रहन सही आहार–बिहार र हेरचाहमा ध्यान दिनुपर्ने तथा कुष्ठरोगजस्ता सङ्क्रामक रोग लागेमा नियमित उपचारलाई जनचेतनाकै रूपमा सञ्चालन गर्न आग्रह गरे। प्रधानमन्त्री ओलीले पञ्चायतकालमा गोलघरमा रहँदा चिसो भुइँमा राखेर यातना दिइएको स्मरण गर्दै त्यही कारण आफ्नो मिर्गौला फेल भएको प्रसङ्ग पनि उल्लेख गरे।
प्रधानमन्त्री ओलीले कुष्ठरोगीलाई हेलाँहोचो नगर्न कानुनमा संशोधन गर्ने र रोग सर्नबाट बच्ने उपायका लागि सरकारले आवश्यक सहजीकरण गर्ने बताए। उनले रोग लुकाउनु हुँदैन भन्ने सन्देशसहित आम सञ्चार र सूचना प्रविधिका माध्यमबाट कुष्ठरोग निवारणका लागि जनचेतना फैलाउन स्वास्थ्य मन्त्रालयलाई आग्रह गरे।
