वीरगन्ज । नारायणी अस्पतालले करिब १७ करोड ३४ लाख रुपैयाँ बराबरको चार वटा टेन्डर निश्चित कम्पनीले मात्र प्रतिस्पर्धा गर्न सक्ने गरी स्वीकृत गर्ने प्रक्रिया अगाडि बढाएको पाइएको छ। अस्पतालले फरक-फरक प्रकृतिका सामग्रीहरूको एकै प्याकेज बनाएर टेन्डर आह्वान गरेको थियो।
अस्पतालले एक करोड ४० लाखमा ‘क्याथ ल्याब’, तीन करोड ४८ लाखमा ‘युरो सर्जरी’, चार करोड ६० लाखमा ‘मेडिकल इक्वीप्मेन्ट्स’ र सात करोड ८६ लाखमा ‘ओटी सेटअप’ सम्बन्धी मेसिन खरिदका लागि टेन्डर आव्हान गरेको थियो। अन्य सप्लायर्सहरूले मापदण्ड बदनियतका साथ निश्चित कम्पनीको प्रस्ताव मात्र पास हुने गरी बनाएको भन्दै संशोधनको माग गरे पनि सुनुवाइ भएन।
चार टेन्डरमध्ये ओटी सेटअप सम्बन्धी मेसिनको खरिद मापदण्डका केही प्रावधान संशोधन गरिए पनि अन्य तीनको जस्ताको त्यस्तै राखियो। अस्पताल प्रशासनले निश्चित कम्पनीलाई फाइदा दिने नियतले खरिद प्रक्रिया अगाडि बढाएको देखिएपछि अन्य सप्लायर्स कम्पनीहरू प्रतिस्पर्धामा सहभागी नै भएनन्। अस्पताल प्रमुख चुमनलाल दासका अनुसार चारवटै टेन्डरमा एक-एक मात्रै प्रस्ताव परेका थिए। प्रतिस्पर्धा हुन नसक्ने अवस्थामा पनि अस्पताल प्रशासनले प्रक्रिया रद्द नगरी एकल प्रस्तावकको प्राविधिक प्रस्ताव स्वीकृत गरेर आर्थिक प्रस्ताव खोल्ने सूचना जारी गरेको छ।
वैशाख २२ गते सार्वजनिक सूचना अनुसार चारवटै ठेक्कामा एक-एक मात्र सप्लायर्स कम्पनी छनोट भएका छन्। करिब १२ करोड ४६ लाख रुपैयाँको दुई वटा टेन्डरको प्राविधिक मूल्याङ्कनमा बारा सिम्रौनगढका शशी कुमार श्रीवास्तवको कम्पनी ‘पीएसई लाइफ साइन्सेस प्रालि’ छानिएको छ। यो कम्पनीले सात करोड ८६ लाखको ‘ओटी सेटअप’ र चार करोड ६० लाखको ‘मेडिकल इक्विप्मेन्ट्स’को टेन्डरमा एकल प्रस्ताव पेस गरेको थियो। करिब तीन करोड ४८ लाखको ‘युरो सर्जरी इक्विप्मेन्ट्स’को टेन्डरमा ‘डीबी मेडिसिन सेन्टर’ (सञ्चालक दुश्यन बस्नेत) र एक करोड ४० लाखको ‘क्याथ ल्याब इक्विप्मेन्ट्स’को टेन्डरमा ‘बायोमेड इन्टरनेश्नल प्रालि’ (प्रमुख उमेश अग्रवाल) मात्र छानिएका छन्।
टेन्डरमा अन्तर्राष्ट्रिय स्तरको बोलपत्रलाई निषेध गर्दै राष्ट्रिय स्तरको बोलपत्र विधि अपनाइएको र ३० दिनभित्र सामग्री ल्याइदिनुपर्ने अनौठो सर्त राखिएको छ। यी मेसिन तथा उपकरण विदेशबाट ल्याउनुपर्ने र टेन्डर पाएपछि मात्र प्रक्रिया अगाडि बढाउने हुँदा ३० दिनमा ल्याउन सामान्यतया सम्भव छैन। यसले टेन्डर प्रक्रिया अगाडि बढाउने चरणमै मिलेमतो भएको आशंका बढाएको छ।
अस्पतालले विभिन्न फरक प्रकृतिका सामग्रीलाई एउटै प्याकेजमा राखेको छ, जुन भ्रष्टाचार निवारण ऐन अनुसार भ्रष्टाचार मानिन्छ। खरिद मापदण्ड निश्चित कम्पनीका लागि मात्र मिल्ने गरी बनाइनु र प्रतिस्पर्धालाई सीमित पार्नु पनि भ्रष्टाचार भएको अख्तियार दुरुपयोग अनुसन्धान आयोगले यसअघि नै स्पष्ट पारेको छ।
टेन्डरको मापदण्ड बनाउन अस्पतालले ‘एमकेयर टेक्नोलोजी’ नामक निजी कम्पनीमा संलग्न बायोमेडिकल इन्जिनियर अमित चौधरीलाई प्रयोग गरेको पाइएको छ, जसले निश्चित कम्पनीलाई फाइदा हुने गरी स्पेशिफिकेशन बनाएको आशंका गरिएको छ। अस्पताल प्रमुख डा. चुमनलाल दासले भने ‘चारवटै टेन्डरमा सिङ्गल बिड मात्र परेको’ भन्ने बहाना बनाएका छन्।
