पोखरिया । पोखरिया नगरपालिकाभित्रका २६ वटा सामुदायिक विद्यालयहरूको शैक्षिक गुणस्तर अभिवृद्धि गर्ने उद्देश्यले प्रधानाध्यापकहरूसँग एक महत्त्वपूर्ण बैठक सम्पन्न भएको छ। पोखरिया नगरपालिका वडा नम्बर ४ मा अवस्थित जिल्ला उचाँगल रामदेव कलवार माध्यमिक विद्यालयमा आयोजित यस छलफलमा शैक्षिक सत्र २०८२ लाई प्रभावकारी बनाउने विभिन्न पक्षमा विस्तृत रूपमा विचारविमर्श गरिएको छ ।
बैठकको मुख्य एजेन्डा शैक्षिक सत्र २०८२ मा शिक्षक आन्दोलनका कारण अवरुद्ध भएको पठनपाठनलाई सुचारु गर्दै विद्यार्थीहरूको छुटेको पाठ्यक्रमलाई कसरी सम्पन्न गर्ने भन्ने विषयमा केन्द्रित थियो। प्रधानाध्यापकहरूले यस चुनौतीलाई सामना गर्न विभिन्न उपायहरू सुझाएका थिए।
यसैगरी, नयाँ शैक्षिक सत्रको विद्यार्थी भर्ना अभियानलाई सफल बनाउन घरदैलो कार्यक्रम सञ्चालन गरी विद्यालयबाहिर रहेका बालबालिका तथा पढ्ने उमेरका तर विद्यालय छोडेका युवाहरूलाई विद्यालयमा भर्ना गराउने ठोस योजना पनि तय गरिएको छ। नियमित रूपमा कक्षा सञ्चालन गर्ने, शिक्षकहरू समयमै विद्यालय उपस्थित हुने र विद्यालय अवधिभर विद्यालयमै रहने विषयलाई कडाइका साथ पालना गराउने सहमति भएको छ।
विद्यालयहरूको भौतिक पूर्वाधार सुधारलाई पनि बैठकमा प्राथमिकता दिइएको थियो। विशेषगरी, कक्षाकोठामा आवश्यक पर्ने टेबल, कुर्सी, डेस्क, बेन्च, पंखा तथा शौचालयको सरसफाइलगायतका आधारभूत आवश्यकताहरूको व्यवस्थापन र स्तरोन्नति गर्ने विषयमा छलफल भएको छ।
केही आधारभूत विद्यालयहरूमा आईसीटी (सूचना तथा सञ्चार प्रविधि) शिक्षकको अभावका कारण बन्द रहेका कक्षा सञ्चालनका लागि यथाशीघ्र शिक्षक पदपूर्ति गर्ने सम्बन्धमा पनि गम्भीर छलफल भएको कुरा पोखरिया नगरपालिकाका प्रमुख प्रशासकीय अधिकृत रामविनय कुमार सिंहले जानकारी गराए।
नगर प्रमुख प्रदुमन प्रसाद चौहानको प्रमुख आतिथ्यमा सम्पन्न भएको उक्त बैठकमा नगर प्रमुखले शिक्षकहरूले उठाएका जायज सवालहरूको जवाफ दिँदै शिक्षकहरूको लगनशीलता र सक्रियताले नै शैक्षिक सत्र २०८२ को परीक्षामा विद्यार्थीहरूले उत्कृष्ट नतिजा हासिल गर्ने विश्वास व्यक्त गरे।
प्रमुख प्रशासकीय अधिकृत रामविनय कुमार सिंहको अध्यक्षतामा भएको बैठकमा शिक्षा शाखा प्रमुख विजय कुमार झा, शिक्षा शाखा सहायक विनोद प्रसाद चौहान, नगर प्रहरी इन्चार्ज दिनेश प्रसाद चौहान, विभिन्न विद्यालयका प्रधानाध्यापकहरू ओमप्रकाश प्रसाद रौनियार, शंकर प्रसाद रौनियार, लालबाबु प्रसाद चौहान, रामबाबु प्रसाद चौहान, पारस ठाकुर हजामलगायत अन्य सरोकारवालाहरूको उपस्थिति रहेको थियो।
