काठमाडौँ । यस वर्षको माध्यमिक शिक्षा उत्तीर्ण परीक्षा (कक्षा १२ परीक्षा) आज आइतबारबाट सुरु हुँदै छ। राष्ट्रिय परीक्षा बोर्ड भक्तपुरले परीक्षाको आवश्यक सम्पूर्ण तयारी पूरा भएको जनाएको छ।
बोर्डका अनुसार साधारण तथा प्राविधिक विषय समूहतर्फका नियमित र आंशिक परीक्षार्थीको वार्षिक परीक्षा आज सुरु भएर आगामी जेठ २ गतेसम्म चल्नेछ।
उक्त परीक्षामा देशभरका पाँच हजार २०२ विद्यालयका पाँच लाख ११ हजार ५२५ परीक्षार्थी सहभागी हुँदै छन्। जसमध्ये नियमिततर्फ तीन लाख ९५ हजार ९०८ जना (छात्र १ लाख ९८ हजार ८७५ र छात्रा १ लाख ९७ हजार १३) रहेका छन्। आंशिकतर्फ एक लाख १५ हजार ६१७ जना परीक्षार्थी सहभागी हुनेछन्।
सबैभन्दा कम परीक्षार्थी मनाङमा (४५ जना) र सबैभन्दा बढी काठमाडौं जिल्लामा (६८ हजार १३३ जना) रहेका छन्।
परीक्षा नियन्त्रण कार्यालयले नेपालभर एक हजार ५९० र जापानमा एक गरी कुल एक हजार ५९१ परीक्षा केन्द्र निर्धारण गरेको छ। सबैभन्दा बढी काठमाडौंमा १६२ र मनाङ, मुस्ताङ र जापानमा १/१ वटा केन्द्र रहेका छन्।
परीक्षा बिहान ८ः०० बजेदेखि ११ः०० बजेसम्म सञ्चालन हुनेछ। परीक्षाका लागि केन्द्राध्यक्ष, सहायक केन्द्राध्यक्ष, निरीक्षक, कर्मचारी, कार्यालय सहयोगी र सुरक्षाकर्मी गरी ४८ हजार २०९ जनशक्ति खटिनेछन्।
यसअघि वैशाख ११ गतेदेखि तय भएको परीक्षा शिक्षक महासंघको आन्दोलनका कारण स्थगित भएको थियो। हाल महासंघ र सरकारबीच सहमति भइसकेको छ।
