काठमाडौं । नाडा अटो मोबाइल्स एसोसिएसन अफ नेपालमा चुनावअघिदेखि नै जारी रहेको अध्यक्ष करण चौधरी र वरिष्ठ उपाध्यक्ष आकाश गोल्छाबीचको विवाद थप चर्केको छ। विधान संशोधनको प्रक्रिया नपुगेको भन्दै चौधरीले वरिष्ठ उपाध्यक्ष गोल्छालाई कार्यसमिति सदस्यमा घटुवा गरेपछि यो विवाद सतहमा आएको हो।
डेढ वर्षअघिको महाधिवेशनमा अध्यक्षका प्रत्यासी रहेका चौधरी र गोल्छाबीच सहमति भएको थियो, जसमा चौधरी अध्यक्ष र गोल्छा वरिष्ठ उपाध्यक्ष हुने उल्लेख थियो। सहमतिअनुसार अर्को कार्यकालमा वरिष्ठ उपाध्यक्ष स्वतः अध्यक्ष हुने गरी विधान संशोधनसमेत गरिएको थियो।
यद्यपि, निर्वाचनपछि पनि यी दुई नेताबीचको सम्बन्ध सहज हुन सकेको थिएन। यसबीचमा गोल्छाले राजीनामा दिने चर्चासमेत चलेको थियो। तर, हालै चौधरीले अप्रत्याशित रूपमा गोल्छालाई वरिष्ठ उपाध्यक्षको पदबाट हटाएर साधारण सदस्यमा सीमित गरिदिएका छन्।
नाडाको ४७औँ साधारण सभाले वरिष्ठ उपाध्यक्षको पद सिर्जना गर्नुका साथै उक्त पदमा रहेका व्यक्ति स्वतः अर्को कार्यकालको अध्यक्ष हुने गरी विधान संशोधन गरेको थियो। सोही निर्णयअनुसार आकाश गोल्छा वरिष्ठ उपाध्यक्ष बनेका थिए। कार्यसमितिले अभिक ज्योती र निशान ढकाललाई केन्द्रीय सदस्यमा मनोनित गरेको थियो। तर, उक्त साधारण सभाले गरेको विधान संशोधनलाई जिल्ला प्रशासन कार्यालयमा दर्ता गराई स्वीकृति लिनुपर्नेमा नाडा नेतृत्वले त्यसो नगरेको बताइएको छ।
नाडाको ४८औँ साधारण सभा सम्पन्न भइसक्दा पनि अघिल्लो साधारण सभाको विधान संशोधन प्रस्ताव जिल्ला प्रशासन कार्यालय काठमाडौंमा जानकारी नगराइएको पाइएको छ। जिल्ला प्रशासन कार्यालयले संशोधित विधानलाई मान्यता नदिएपछि सोहीअनुसार बनेका पदाधिकारीलाई कार्यालयले स्वीकार नगरेको नाडाका पदाधिकारीहरू बताउँछन्। नाडाका एक कार्यसमिति सदस्यका अनुसार अध्यक्ष करण चौधरीले वरिष्ठ उपाध्यक्ष गोल्छालाई सुरुदेखि नै बाइपास गर्न खोजेका थिए र सोही कारण विधान संशोधनबारे सीडीओ कार्यालयलाई जानकारी नगराई गोल्छालाई अहिले सोही व्यवस्था देखाएर सदस्यमा घटुवा गरिएको हो।
यद्यपि, स्रोतहरूका अनुसार गोल्छा अर्को समानान्तर संस्था नाइमा सक्रिय भएको झोकमा चौधरीले यो कदम चालेका हुन्।
वरिष्ठ उपाध्यक्षबाट सदस्यमा घटुवा गरिएकोबारे आफूलाई औपचारिक जानकारी नभएको आकाश गोल्छाले बताएका छन्। उनले सीडीओ कार्यालयले विधान संशोधनलाई मान्यता नदिएको सत्य भए पनि त्यो सचिवालयको ढिलाइको कारण भएको र कार्यसमितिमा यसबारे लिखित निर्णय भएको जानकारी नभएको बताए। गोल्छाले वरिष्ठ उपाध्यक्षसँगै मनोनित सदस्यहरू निशान ढकाल र अभिक ज्योतीलाई पनि आमन्त्रित सदस्यमा घटुवा गरिएको जानकारी दिए।
नाडाका एक सदस्यले अध्यक्ष करण चौधरीले अन्य पदाधिकारीसँग छलफल नै नगरी एकलौटी रूपमा गोल्छा, ढकाल र ज्योतीलाई पदबाट हटाएको आरोप लगाएका छन्। उनले चौधरीको एकल निर्णय गर्ने शैली र निजी कम्पनी जसरी चलाउने प्रवृत्तिले नाडा फुटेर नाइमा खुलेको र अहिलेको निर्णयले नाडालाई थप कमजोर बनाएको बताए।
नाडाका सदस्यहरू वरिष्ठ उपाध्यक्ष पद हटाउने भए साधारण सभामा लैजानुपर्ने धारणा राख्छन्। कार्यसमितिले पास गरेको पदलाई सीडीओ कार्यालयले मान्यता नदिए साधारण सभामा छलफल गरी निर्णय गर्नुपर्ने उनीहरूको भनाइ छ। व्यक्तिगत रूपमा निर्णय गर्दा नाडामा सधैँ विवाद भइरहने उनीहरूको चिन्ता छ।
