वीरगंज । वीरगंजलाई सफा, स्वच्छ र सुन्दर बनाउने महानगरपालिकाको अभियानमा अब पान व्यवसायीहरूले पनि साथ दिने भएका छन्। जथाभावी पान, गुट्खा तथा सुर्तीजन्य पदार्थ सेवन गरी फोहोर गर्ने प्रवृत्तिलाई निरुत्साहित गर्न वीरगंज महानगरपालिका र पान, गुट्का तथा सुर्तीजन्य पदार्थ व्यवसायी संघबीच महत्वपूर्ण सहमति भएको छ।
सहमति अनुसार अब वीरगंजका सबै पान पसलहरूमा अनिवार्य रूपमा डस्टबिन राखिनेछ। व्यवसायीहरूले आफ्ना ग्राहकहरूलाई जथाभावी थुक्न र फोहोर गर्न नदिन सचेत गराउने छन्। यसका साथै, गुट्खा तथा सुर्तीजन्य पदार्थहरूको खुल्ला बिक्री वितरणमा कडाइ गरिने भएको छ। विशेषगरी विद्यार्थीहरूलाई यस्ता पदार्थ बिक्री गर्न पूर्ण रूपमा प्रतिबन्ध लगाइएको छ भने विद्यालय र अस्पताल क्षेत्र वरपर यस्ता पसलहरू राख्न पाइने छैन।
वीरगंज महानगरपालिकाका प्रमुख राजेशमान सिंहले यो पहल वीरगंजलाई स्वच्छ र मर्यादित शहर बनाउने प्रतिबद्धताको एक महत्वपूर्ण हिस्सा भएको बताए। उनले भने, “हामी वीरगंजलाई साँच्चिकै सुन्दर शहर बनाउन चाहन्छौं र यसका लागि सबैको सहयोग आवश्यक छ।”
पान व्यवसायी संघ पर्साका अध्यक्ष लाल बहादुर चौरसियाले पनि सहमतिमा हस्ताक्षर गर्दै सामाजिक उत्तरदायित्व बहन गर्न आफूहरू तयार रहेको बताए। उनले विद्यालयका बालबालिका, बिरामी र अन्य नागरिकको स्वास्थ्यलाई ध्यानमा राख्दै अनुशासित बिक्री प्रणालीमा सहयोग गर्ने प्रतिबद्धता व्यक्त गरे।
यति मात्र होइन, व्यवसायी संघले अब पान, गुट्खा तथा सुर्तीजन्य पदार्थ सेवन गरेर जथाभावी नथुक्न र फोहोर नगर्न सचेतनामूलक र्याली प्रदर्शन गर्ने पनि भएको छ। यसले नागरिकहरूलाई आफ्नो शहरलाई सफा राख्न थप प्रेरित गर्ने विश्वास लिइएको छ। साथै, सबै पान व्यवसायीहरूले महानगरपालिकामा व्यवसाय दर्ता गरेर मात्र आफ्नो व्यवसाय सञ्चालन गर्ने भएका छन्।
महानगरपालिकाका प्रमुख प्रशासकीय अधिकृत अरविन्द लाल कर्णले अब बजार अनुगमनलाई तीव्र बनाइने र नियम उल्लंघन गर्नेलाई कडा कारबाही गरिने बताए। उनले नागरिकहरूलाई पनि सचेत रहन आग्रह गरे।
सार्वजनिक हितका लागि गरिएको यो सहकार्यले वीरगंजको सफाइ अभियानमा एक नयाँ अध्याय सुरु हुने अपेक्षा गरिएको छ। अब वीरगंजवासीले चिटिक्क र सफा शहरमा सास फेर्न पाउने आशा पलाएको छ।
