पोखरिया । सरकारी जग्गामा अवैध रूपमा निर्माण गरिएको टहरा सशस्त्र प्रहरीले हटाएको छ। पर्साको धोबिनी गाउँपालिका वडा नम्बर २, भिखमपुरमा गण्डक नहर छेउको नारायणी सिँचाइ डिभिजन कार्यालय वीरगञ्ज पर्साको स्वामित्वमा रहेको जग्गामा किसुनदेव साह सोनार र लालमती देवी सोनारीनले निर्माण गरी चिया तथा मासु पसल सञ्चालन गर्दै आएको उक्त टहरालाई बोर्डर आउट पोष्ट भिखमपुरका डीएसपी रमेश कुमार गुरुँगको कमाण्डमा खटिएको प्रहरी टोलीले हटाएको हो ।
स्थानीय लालमती देवी सोनारीनले टहराभित्र रहेको बियरका बोतल, चाउचाउ, ग्यास सिलिन्डर, अण्डाको कार्टुन, सुत्ने खाट, टेबल कुर्सी, भाडा बर्तन लगायतका सामान प्रहरीले तितरबितर पारेर बेस क्याम्पमा लगेको दाबी गरेकी छन्।
उनले आफ्नो निजी जग्गा नभएको र सरकारी जग्गामा टहरा बनाएर केही वर्षदेखि बस्दै आएको बताइन्। तर स्थानीयहरूका अनुसार भिखमपुरमा उनको ३ कठ्ठा आफ्नै जग्गा रहेको बताइएको छ। छोरीको विवाहका लागि सामाजिक सुरक्षा भत्ताको ४८ हजार रुपैयाँ र पसल सञ्चालनबाट जम्मा भएको केही रकम पनि हराएको उनले गुनासो गरेकी छन्।
यता, सशस्त्र प्रहरी बल सुरक्षा बेस क्याम्प भिखमपुरका प्रहरी प्रमुख डीएसपी रमेश कुमार गुरुँगले टहरा नजिकै सशस्त्र प्रहरीको गस्ती टोली रहेको र सो स्थानमा प्रहरीको नियमित ड्यूटी हुने बताए । उनले टहराको छाना माथि दुई दिशाबाट ३३ केभी प्रसारण लाइनको तार क्रस गरेको जानकारी दिए ।
गर्मी मौसममा तारबाट आगोको झिल्का खसेर भौतिक क्षति तथा मानवीय दुर्घटना हुन सक्ने खतरालाई मध्यनजर गर्दै प्रहरीले टहरा अन्यत्र सार्न आग्रह गरेको तर सोनारीनले बेवास्ता गरेको उनको भनाइ छ।
डीएसपी गुरुँगका अनुसार नारायणी सिँचाइ डिभिजन कार्यालय वीरगञ्ज पर्सा, नेपाल विद्युत प्राधिकरण पोखरिया वितरण केन्द्र पर्सा, इलाका प्रहरी कार्यालय जानकीटोला पर्सा र धोबिनी गाउँपालिका वडा नम्बर २ को समन्वयमा भौतिक तथा मानवीय क्षति हुन नदिन टहरा हटाइएको हो।
टहरा हटाउने क्रममा त्यहाँ रहेका व्यक्तिले आफैँ सामान बाहिर निकालेर फालेपछि ती सामानहरूलाई ल्याएर नारायणी सिँचाइ डिभिजन कार्यालय भिखमपुर पर्सामा सुरक्षित राखिएको जानकारी उनले दिए।
