काठमाडौं । सशस्त्र प्रहरी बलका पूर्वमहानिरीक्षक पुष्पराम केसी नेकपा एमालेको राजनीतिमा सक्रिय भएका छन्। उनी एमाले निकट नेपाल भूतपूर्व सैनिक तथा प्रहरी संगठनमा आबद्ध भएका हुन्।
शनिबार सम्पन्न संगठनको छैंटौं अधिवेशनले केसीलाई भेटरान कमिटी आयोगको अध्यक्षमा चयन गरेको छ। केसी करिब दुई साताका लागि मात्र सशस्त्र प्रहरीको आईजीपी भएका थिए।
एआईजी हुँदा आईजीपी शैलेन्द्र खनालसँग उनको टक्कर थियो। आईजीपी भएको छोटो समयमा उनले ३० वर्षे सेवाहद हटाउने प्रयास गरे पनि सफल भएनन्। अवकाशको तीन वर्षपछि उनी प्रधानमन्त्री केपी शर्मा ओलीका राजनीतिक सल्लाहकार विष्णु रिमाल निकट मानिन्छन् र एमालेको राजनीतिमा लागेका हुन्। कतिपयले भने उनको यो कदम अकुत सम्पत्ति जोगाउने उद्देश्यले पनि हुन सक्ने अनुमान गरेका छन्।
यसअघि नेपाल प्रहरीका पूर्वमहानिरीक्षक सर्वेन्द्र खनाल पनि एमालेको राजनीतिमा लागे पनि हाल स्वतन्त्र अभियानमा छन्। पूर्वडीआईजी नवराज सिलवाल भने एमालेकै राजनीतिमा सक्रिय छन्।
