विरगञ्ज । आज शनिबार र भोलि आइतबार देशभर करिब २२ लाख बालबालिकालाई बालभिटा, भिटामिन ‘ए’ क्याप्सुल र जुकाको औषधि खुवाइँदै छ। स्वास्थ्य तथा जनसंख्या मन्त्रालयले राष्ट्रिय भिटामिन ‘ए’ कार्यक्रमअन्तर्गत यो अभियान संचालन गरिरहेको छ।
बालबालिकामा व्याप्त कुपोषणको समस्यालाई मध्यनजर गर्दै शारीरिक, बौद्धिक र मानसिक विकासमा टेवा पुर्याउन यो कार्यक्रम महत्वपूर्ण मानिएको छ। स्वास्थ्य सेवा विभागअन्तर्गत परिवार कल्याण महाशाखाका निर्देशक डा. विवेक कुमार लालका अनुसार बालबालिकामा सूक्ष्मपोषक तत्व, विशेषगरी भिटामिन ‘ए’ को कमी देखिने गरेको छ, जसले रतन्धो र दृष्टिविहीनता जस्ता समस्या निम्त्याउन सक्छ। यसैलाई न्यूनीकरण गर्न छ महिनादेखि ५९ महिनासम्मका बालबालिकालाई वर्षको दुई पटक भिटामिन ‘ए’ र एक वर्षदेखि पाँच वर्षसम्मकालाई जुकाको औषधि खुवाउने गरिएको छ। जुकाको संक्रमणले आन्द्रामा घाउ बनाई पोषक तत्व सोस्ने हुँदा कुपोषणको जोखिम बढ्छ। साथै, बालबालिकालाई बालभिटा पनि खुवाइने छ र पोषणको अवस्था जाँचिने छ।
यस कार्यक्रमका लागि करिब ५२ हजार महिला स्वास्थ्य स्वयंसेविका र १५ हजार स्वास्थ्यकर्मी परिचालन भएका छन्। नेपालमा भिटामिन ‘ए’ को कमी हटाउन २०५० सालमा आठ जिल्लाबाट सुरु भएको यो कार्यक्रम २०५९ देखि देशभर लागू भएको हो। जुका नियन्त्रणका लागि औषधि खुवाउने कार्यक्रम २०५६ मा १३ जिल्लाबाट सुरु भई २०६७ देखि सबै जिल्लामा विस्तार भएको हो भने बालभिटा २०६४ देखि वितरण गर्न थालिएको हो। सरकारले प्रत्येक वर्ष कात्तिक र वैशाखमा यो कार्यक्रम निःशुल्क रुपमा सञ्चालन गर्दै आएको छ। भिटामिन ‘ए’ आँखाको स्वास्थ्य र रोग प्रतिरोधात्मक क्षमताका लागि अपरिहार्य छ।
