३० चैत, वीरगञ्ज । हनुमान जयन्तीको अवसरमा शनिबार वीरगञ्जमा आयोजित शोभा यात्राका क्रममा छपकैया इदगाह चोकमा दुई पक्षबीच झडप भएपछि स्थिति तनावग्रस्त बनेको छ । बढ्दो तनावलाई नियन्त्रणमा लिन जिल्ला प्रशासन कार्यालय पर्साले कर्फ्यु आदेश जारी गरेको छ ।
पर्साका प्रमुख जिल्ला अधिकारी गणेश अर्यालले स्थानीय प्रशासन ऐन २०२८ को दफा ६(क) अनुसार शनिबार साँझ ६ः३० बजेदेखि आइतबार मध्यान्ह १२ बजेसम्म कर्फ्यु लागू हुने जानकारी दिएका छन् ।
कर्फ्यु क्षेत्रको चारकिल्ला यस्तो छ :
पूर्वः वीरगञ्ज–१५ को भेडियाही चोक
पश्चिमः वीरगञ्ज–२५ को सिर्सिया पुल
उत्तरः वीरगञ्ज–१४ को गण्डक चोक
दक्षिणः वीरगञ्ज–१६ को शङ्कराचार्य गेट
कर्फ्यु अवधिभर सो क्षेत्रभित्र सर्वसाधारणको आवतजावत, सभा, जुलुस, प्रदर्शन, घेराउ लगायतका सबै गतिविधिमा पूर्ण प्रतिबन्ध लगाइएको छ । प्रशासनले शान्ति–सुरक्षा कायम राख्न नागरिकलाई संयमित रहन आग्रह गरेको छ ।
झडप कसरी सुरु भयो ?
स्थानीय प्रत्यक्षदर्शीका अनुसार शोभा यात्रा इदगाह चोक नजिक पुग्दा एक पक्षले अर्को धर्मावलम्बीको घरको छतबाट ढुंगा प्रहार गरेको दाबी गरिएको छ । “शान्तिपूर्ण रुपमा गीत–संगीतका साथ अगाडि बढिरहेको यात्रामा ढुंगा प्रहार भएपछि झडप सुरु भयो,” एक सहभागीले भने ।
ढुंगामुढापछि आक्रोशित भिडले इदगाह चोकमा रहेका दुई होटेलमा तोडफोड गर्नुका साथै करिब आधा दर्जन मोटरसाइकलमा आगजनी गरेको थियो । झडपमा करिब डेढ दर्जन सर्वसाधारण र सुरक्षाकर्मी घाइते भएका छन् । घाइतेहरूको नारायणी अस्पतालमा उपचार भइरहेको छ ।
स्थिति नियन्त्रणमा ल्याउन अश्रुग्यास प्रयोग
प्रहरीले भिड तितरबितर पार्न थुप्रै राउण्ड अश्रुग्यास प्रहार गरेको छ । हाल स्थिति नियन्त्रणमा रहेको जनाइएको छ, तर तनावपूर्ण अवस्था कायमै छ ।
प्रशासनले घटनाको पूर्ण विवरण संकलन भइरहेको जनाएको छ भने दोषी पहिचान गरी आवश्यक कारबाही गरिने बताएको छ ।
