वीरगन्ज । वीरगन्ज महानगरपालिकाले आज महानगरपालिका वडा नम्बर १० आदर्शनगरस्थित ठाकुरराम बहुमुखी क्याम्पस पछाडि रहेको ग्यालेक्सी सेकेण्ड्री स्कुलमा शीलबन्दी गरेको छ । महानगरपालिकाले विद्यालयलाई अनाधिकृत रुपमा सञ्चालन गरेको भन्दै यो कदम चालेको हो ।
वीरगन्ज महानगरपालिकाको शैक्षिक प्रशासन महाशाखाका प्रमुख आनन्द लामिछानेका अनुसार विद्यालय सञ्चालनको अनुमति र आवश्यक कागजात पेश गर्न पटकपटक निर्देशन दिइए पनि विद्यालय प्रशासनले अटेर गरेपछि शीलबन्दी गरिएको हो । उनले भने, “कक्षा १० सम्म सञ्चालनको अनुमति लिएको भन्ने जानकारी भए पनि विद्यालयले हालसम्म कुनै पनि आधिकारिक कागजात महानगरपालिकालाई उपलब्ध गराएको छैन ।”
प्रमुख लामिछानेले थप जानकारी दिँदै माघ १३ गते नै विद्यालयलाई कागजातसहित महानगरपालिकामा उपस्थित हुन निर्देशन दिइएको भएपनि हालसम्म सञ्चालक सम्पर्कमा नआएको र कुनै कागजात पेश नगरिएको बताए । विद्यालयको सञ्चालक को हो भन्ने समेत यकिन हुन नसकेको महानगरपालिकाले जनाएको छ ।
सोरजनी मेमोरियल ट्रष्टको जग्गामा भारतीय महावाणिज्य दूतावासले निर्माण गरिदिएको भवनमा उक्त विद्यालय सञ्चालनमा रहेको पाइएको छ । महाशाखा प्रमुख लामिछानेले विद्यालय तेश्रो पक्षबाट चौथो पक्षलाई सञ्चालन गर्न दिइएको भन्ने सूचना आएको र हाल सञ्चालकको पहिचान गर्ने कार्य भइरहेको बताए । सञ्चालकको पहिचान भएलगत्तै प्रचलित ऐन कानून बमोजिम कारबाही प्रक्रिया अगाडि बढाइने उनले जानकारी दिए ।
आजको शीलबन्दी प्रक्रियामा नगर प्रमुखका जनसम्पर्क सल्लाहकार नवराज फुयाँल, शैक्षिक प्रशासन महाशाखाका शिक्षा अधिकृत सृजना बुढाथोकी, नगर प्रहरी इन्चार्ज हरि प्रसाद भुषाल लगायत सञ्चारकर्मीहरूको सहभागिता रहेको थियो ।
महानगरपालिकाले अनुमति नलिई अवैध रूपमा सञ्चालनमा रहेका विद्यालयहरूलाई कारबाही गर्ने अभियानलाई निरन्तरता दिएको छ ।
