बिरगञ्ज । बीरगञ्जमा भन्सार छलेर भित्र्याइएका लाखौं मूल्य बराबरका कपडाहरु रहस्यमय तरिकाले बरामद भएका छन्। विशेष सूचनाको आधारमा प्रस्तावित सीमा सुरक्षा गुल्म बीरगञ्जबाट खटिएको टोलीले चलाएको अप्रेशनले अबैध कारोबारको जालोलाई उदाङ्गो पारेको हो।
घटनाको सुरुवात बीरगञ्ज महानगरपालिका(१६ स्थित भुटनदेवी मन्दिर नजिकबाट भयो। बा.प्र.०१-०२७ च ८५०३ नम्बरको सेतो रंगको टाटा योद्धा सिंगल क्याब पिकअप गाडीमा २० बोरा कपडा लोड गरी जीतपुर(सिमरा तर्फ लैजाँदै गरेको गोप्य सूचना सुरक्षाकर्मीसम्म पुग्यो।
सप्रनाउ लोकेन्द्र सुब्बाको कमाण्डमा रहेको सुरक्षा टोलीले तत्कालै उक्त गाडीलाई पिछा गर्न थाल्यो। चोर बाटो हुँदै तीव्र गतिमा गुडिरहेको पिकअपलाई पछ्याउँदै सुरक्षाकर्मीहरु बारा जिल्लाको जितपुर सिमरा उपमहानगरपालिका वडा(२३ स्थित भलुवाही गाउँसम्म पुगे। तर त्यहाँ पुग्दा सुरक्षाकर्मीहरु आश्चर्यमा परे। पिकअप गाडी साँघुरो गल्लीमा बेवारिसे अवस्थामा छाडिएको थियो भने चालक फरार भइसकेका थिए।
गाडीको पछिल्लो भागमा त्रिपालले छोपिएको २० बोरा कपडा फेला पर्यो। जब त्रिपाल खोलियो, त्यहाँ सर्टिङ्ग सुटिङ्ग, सारी र कुर्तासुरवाल जस्ता विभिन्न प्रकारका कपडाहरुको ठूलो भण्डार देखियो।
प्रारम्भिक अनुमान अनुसार बरामद गरिएको कपडाको मूल्य १० लाख ७ हजार ९ सय रुपैयाँ रहेको सशस्त्र प्रहरी बल नम्बर १३ गण हेडक्वाटर पर्साका सूचना अधिकारी सशस्त्र प्रहरी नायव उपरीक्षक देवेन्द्र सिंहले जानकारी दिए ।
यति मात्र होइन, बेवारिसे अवस्थामा फेला परेको पिकअप गाडीको भन्सार दाखिला मूल्य २५ लाख रुपैयाँ रहेको बताइएको छ। यसरी जम्मा ३५ लाख ७ हजार ९ सय रुपैयाँ बराबरको गाडी र अबैध कपडाहरु सुरक्षाकर्मीको हात लागेको छ।
घटनास्थलबाट फरार भएका चालकको खोजी कार्य जारी रहेको छ भने बरामद गरिएको गाडी र कपडाहरु आवश्यक कारबाहीको लागि वीरगञ्ज भन्सार कार्यालयमा बुझाइएको छ।
यो घटनाले सीमा क्षेत्रमा हुने अबैध व्यापारको चुनौतीलाई फेरि एकपटक उजागर गरेको छ। सुरक्षा निकायले यस घटनाको गहिरो अनुसन्धान गरी अबैध कारोबारमा संलग्न अन्य व्यक्तिहरुलाई पनि कानूनी दायरामा ल्याउने सशस्त्र प्रहरी नायव उपरीक्षक सिंहले बताए ।
