वीरगन्ज। वीरगन्जमा आजदेखि टु द भीआरु क्रिकेट टुर्नामेण्टको धमाकेदार सुरुवात भएको छ। सोसियल युथ युनिटी क्लबको आयोजनामा वीरगन्ज महानगरपालिका वडा नम्बर १५ मा आयोजित प्रतियोगिताको उद्घाटन समारोह भव्यताका साथ सम्पन्न भएको छ।
पर्सा क्रिकेट संघ क्यानका अध्यक्ष मनिष सिंह र प्रेस सेन्टर नेपालका मधेस प्रदेश अध्यक्ष नीरज पिठाकोटे मगरले संयुक्त रूपमा प्रतियोगिताको उद्घाटन गरेका थिए। क्लबका अध्यक्ष विक्की मण्डलको अध्यक्षतामा भएको उद्घाटन कार्यक्रममा नेपाल पत्रकार महासंघ पर्साका सदस्य रितेश झा, प्रेस सेन्टर नेपाल पर्साका सदस्य अनिल ओझा लगायत विभिन्न व्यक्तित्वहरूको उपस्थिति रहेको थियो।
आयोजक क्लबका अनुसार प्रतियोगितामा महानगरपालिकाका विभिन्न वडाबाट मुरली स्ट्राइकर्स, मुरली इलेभेन स्टार्स, मुरली नाईट राईडर्स, आरआर हार्डवेयर, ब्रेभ रिबेल्स र एमएसीएस बीआरजे गरी ६ वटा टिमले प्रतिस्पर्धा गर्नेछन्।
उद्घाटन खेलमा मुरली नाईट राईडर्सले ब्रेभ रिबेल्सलाई ४० रनले पराजित गर्दै विजयी सुरुवात गरेको छ। १६ ओभरको खेलमा टस जितेर पहिले बलिङ गरेको ब्रेभ रिबेल्सविरुद्ध मुरली नाईट राईडर्सले १४.३ ओभरमा सबै विकेट गुमाएर १०७ रनको योगफल खडा गरेको थियो। जवाफी ब्याटिङमा उत्रेको ब्रेभ रिबेल्स १०.५ ओभरमा मात्र ६७ रन बनाउँदै सबै विकेट गुमाउन पुग्यो।
विभिन्न ६ टोलीको सहभागिता रहेको यस प्रतियोगितामा १६ वटा लिग खेल र त्यसपछि प्लेअफ खेलहरू हुनेछन्। आयोजक क्लबका विक्की महतोका अनुसार यो क्रिकेट महोत्सव आगामी अप्रिल १५ सम्म चल्नेछ।
