वीरगन्ज । काठमाडौँको तीनकुनेमा भएको प्रदर्शनमा प्रहरीसँगको झडपपछि नाटकीय ढंगले भागेका दुर्गा प्रसाईं भारत पुगेको पुष्टि भएको छ। फिल्मी शैलीमा उग्र समर्थकलाई उक्साएर एक घरको सटरभित्र लुकेका प्रसाईं धर्मगुरु पुष्कर खतिवडासँगै गाडीमा चढेर फरार भएका थिए।
प्रहरीको पछिल्लो अनुसन्धान अनुसार, प्रसाईंले प्रयोग गरेको गाडी झापाको बीएन्डसी कलेजमा फेला परेको छ। सो गाडी नियन्त्रणमा लिएर प्रहरीले अनुसन्धान थालेको छ। प्रहरीका अनुसार, प्रसाईंको गाडी बीपी राजमार्ग हुँदै काकडभिट्टा नाकासम्म पुगेको थियो, जहाँबाट उनी अर्को गाडीमा चढेर भारत छिरेका थिए।
प्रहरी उच्च स्रोतका अनुसार, काठमाडौँबाट काकडभिट्टासम्मको यात्रामा उनले विभिन्न रणनीति अपनाएको देखिन्छ। प्रसाईंको खोजीमा प्रहरीले झापास्थित उनको घरमा पनि पुगेको थियो। प्रहरीले गाडी र चालकलाई नियन्त्रणमा लिएर अनुसन्धान गरिरहेको छ।
यस घटनामा प्रहरीले राप्रपाका वरिष्ठ उपाध्यक्ष रवीन्द्र मिश्र, धवल शमशेर राणासहित ६६ जनालाई पक्राउ गरेको छ। उनीहरूमाथि राज्यविरुद्धको कसुर, आपराधिक उपद्रव र संगठित अपराधमा अनुसन्धान भइरहेको छ। प्रसाईंको नाटकीय पलायन र प्रहरीको अनुसन्धानले यो घटनालाई थप रोचक बनाएको छ।
