वीरगन्ज । पर्साको ग्रामीण भेगमा गहुँको मूल्यमा वृद्धि हुँदा किसानहरू हर्षित भएका छन्। गत वर्षको तुलनामा यस वर्ष गहुँको मूल्य बढेको छ।
गत वर्ष गहुँको मूल्य प्रति क्विन्टल चार हजार रुपैयाँबाट सुरु भई पछि तीन हजार सात सय रुपैयाँसम्म झरेको थियो। तर यस वर्ष गहुँको मूल्य प्रति क्विन्टल चार हजार पाँच सय रुपैयाँबाट सुरु भएको जिराभवानी गाउँपालिका वडा नं २ सेढवाका बाली खरिद गर्ने व्यापारी धर्मराज यादवले बताएका छन्।
बिहीबार किसानले उत्पादन गरेको गहुँ प्रति क्विन्टल चार हजार दुई सय पचास रुपैयाँको दरले खरिद गरिएको थियो। किसानको खेतबाट गहुँ जोखेर ट्याक्टरमा लोड गरी गोदामबाट लोड गरी वीरगञ्ज बिक्रीका लागि लैजाने गरिएको छ।
ज्यामीको ज्याला र ढुवानी बापत प्रति क्विन्टल एक सय रुपैयाँ लिने गरिएको छ। कृषि कार्यमा आधुनिक मेसिनको विकाससँगै बाली भित्र्याउन हार्वेस्टर मेसिन आएका छन्।
पर्साको ग्रामीण भेगमा पाँचरछ वर्षअघि हार्वेस्टर मेसिन आउँदा किसानले महँगो भाडा तिर्दै आएका थिए। तर यस वर्ष गहुँको भाउ बढेको र हार्वेस्टर मेसिनको संख्या बढेकाले भाडा सस्तिएको किसानको बुझाइ छ।
एक बिघा गहुँ भित्र्याउन दुई क्विन्टलदेखि एक क्विन्टलसम्म हार्वेस्टरको भाडा लाग्छ। एक बिघा गहुँ काटेबापत बढीमा छ हजार र कम्तीमा चार हजार रुपैयाँ तिर्नुपरेको किसानले बताएका छन्।
गत वर्षको तुलनामा २५ देखि ५० प्रतिशतसम्म भाडामा कमी आएको छ। गत वर्षको तुलनामा यस वर्ष धानको भाउ घटेको छ। धान भित्र्याउने कार्तिक महिनामा सोना मन्सुली धानको भाउ प्रति क्विन्टल तीन हजार तीन सय रुपैयाँ र मनी मन्सुली धानको तीन हजार दुई सय रुपैयाँ थियो।
कतिपय किसानले मूल्य बढ्ने आशामा धान भण्डारण गरेर राखेका थिए, तर यस वर्ष मूल्य नबढेका कारण बिक्री गर्न पाएका छैनन्। गत वर्ष फागुन महिनाको अन्तिम सातामा सोना मन्सुली धान प्रति क्विन्टल चार हजार एक सय रुपैयाँ र मनी मन्सुली धान चार हजार रुपैयाँमा बिक्री भएको थियो।
अहिले चैत महिनाको अन्तिम सातामा सोना मन्सुली धान तीन हजार पाँच सय रुपैयाँ र मनी मन्सुली धान तीन हजार चार सय रुपैयाँ प्रति क्विन्टलको दरले खरिद बिक्री भइरहेको किसानले गुनासो गरेका छन्।
