वीरगन्ज : नेपालबाट ठूलो परिमाणको मकै भारततर्फ तस्करी भएको तथ्यले सनसनी मच्चाएको छ। अर्जेन्टिना, ब्राजिल, टर्की र दक्षिण अफ्रिकाबाट पर्सामा आयात गरिएको करिब २० हजार मेट्रिक टन मकै स्थलमार्ग हुँदै भारततर्फ तस्करी भएको खुलासा भएको छ। यसको कुल रकम अमेरिकी डलर एक करोड ७५ लाख हुन आउँछ।
वीरगन्ज भन्सार कार्यालयका अनुसार, हाल वीरगन्ज बन्दरगाहमा २२५ कन्टेनर मकै निर्यातका लागि तयारी अवस्थामा छन्। यसले नेपालमा मकैको कुल आयात २५ हजार मेट्रिक टन पुगेको देखाउँछ।
भारतमा १० हजार मेट्रिक टनभन्दा बढी मकै आयातमा प्रतिबन्ध छ। तर, नेपालमा २५ हजार मेट्रिक टनभन्दा बढी मकै आयात भएको तथ्याङ्कले ठूलो तस्करी भएको संकेत गर्छ।
नेपालमा मकै आयात गर्ने कम्पनीहरूमा धनलक्ष्मी फुड प्रालि वीरगन्ज, निशान्त जैन, नारायणी फुड प्रोडक्टस् प्रालि जितपुर, महावीर इन्टरनेशनल सप्लायर्स प्रालि पर्सा, त्रिवेणी दाल एण्ड आयल इन्डष्ट्रिज प्रालि पर्सा, नरायणी मोडर्न पल्सेज इन्डष्ट्रिज पर्सा, महावीर होल्डिङस् प्रालि छपकैया पर्सा, बालाजी इन्टरप्राइजेज प्रालि पर्सा रहेका छन्।
नेपालमा १० प्रतिशत र भारतमा ५० प्रतिशत भन्सार शुल्क लाग्ने भएकाले तस्करहरूले नेपाललाई मकै आयातको केन्द्र बनाएर भारततर्फ तस्करी गर्ने गरेको प्रारम्भिक अनुमान गरिएको छ। यस घटनाले नेपालको कृषि व्यापारमा गम्भीर प्रश्नहरू उठाएको छ।
साभार समयबद्ध डटकम
