वीरगञ्ज । सशस्त्र प्रहरी बल नेपाल, नम्बर १३ गण हेडक्वार्टर मातहतको टोलीले लागूऔषध सहित एकजनालाई पक्राउ गरेको छ । प्रस्तावित सीमा सुरक्षा गुल्म वीरगञ्जबाट खटिएको सशस्त्र प्रहरीको टोटलीले बाराको महागढिमाई नगरपालिका वडा नं.–१४, भौरा घर बताउने वर्ष १३ को चन्दन सहनीलाई पक्राउ गरेको हो ।
भारत रक्सौलबाट टाँगा चढेर वीरगञ्जतर्फ आउँदै गरेको अबस्थामा शंका लागेर चेकजाँच गर्ने क्रममा उनलाई वीरगञ्ज महानगरपालिका वडा नं.१६ बाट ५० बोतल लागूऔषध सहित पक्राउ गरेको सशस्त्र प्रहरी बल नेपाल नम्बर १३ गण हेडक्वाटर पर्साका सूचना अधिकारी सशस्त्र प्रहरी नायव उपरीक्षक देवेन्द्र सिंहले जानकारी दिए ।
सहनीले बोकेको सेतो रंगको बोराको झोलामा माथिबाट आलुले छोपेर लुकाई छिपाई ल्याउदै गरेको प्रतिबन्धित लागू औषध को (CODEINE PHOSPHATE & TRIPROLIDINE HYDROCHIORIDE SYRUP) ONEREX COUGH SYRUP (100ml) ५० वटा बोतल फेला परेको सूचना अधिकारी सशस्त्र प्रहरी नायव उपरीक्षक सिंहले बताए ।
पक्राउ परेका व्यक्ति सहित उक्त लागू औषध नियन्त्रणमा लिई आवश्यक कारबाहीको लागि प्रहरी चौकी ईनर्वामा बुझाईएको उनले बताए ।
