वीरगन्ज । पर्साका प्रमुख जिल्ला अधिकारी गणेश अर्यालको अध्यक्षतामा जिल्ला प्रशासन कार्यालयमा बुधबार बसेको बैठकले बाल सुधार गृहको अवस्था सुधारका लागि महत्वपूर्ण निर्णयहरू गरेको छ ।
वीरगन्जको बाल सुधार गृहमा रहेका बालबालिकाहरूको हितलाई ध्यानमा राख्दै सरोकारवालाहरुको बैठकले १३ बुँदे निर्णय गरेको हो । बैठकका निर्णय अनुसार, बाल सुधार गृह परिसरमा मर्मत गर्नुपर्ने संरचना र सामग्रीहरूलाई एक हप्ताभित्रै सुधार गृह मर्मत गरी अद्यावधिक गर्ने भएको छ ।
यसैगरी, बालबालिकाहरूको लागि इन्टरनेटको सुविधा अत्यावश्यक भएको महसुस गर्दै आजै वाईफाई जडान गरिने भएको छ भने ल्यापटप र कम्प्युटरहरूको पनि तत्काल मर्मत सम्भार गरिने निर्णय गरेको छ । बालबालिकाहरूको मानसिक स्वास्थ्यलाई ध्यानमा राख्दै बाल सुधार गृहले अबदेखि कम्तीमा हप्ताको एक पटक मनोसामाजिक परामर्श अनिवार्य रूपमा उपलब्ध गराउने भएको छ ।
गर्मी मौसमलाई मध्यनजर गर्दै आवश्यक संख्यामा पंखा र खानेपानीको व्यवस्थापनका लागि जिल्ला प्रशासन कार्यालयले समन्वय गर्ने भएको छ । त्यसैगरी, क्षयरोगबाट सङ्क्रमित बालकको उपचार लगायतका समस्या समाधानका लागि वीरगंज महानगरपालिकासँग समन्वय गरी आवश्यक व्यवस्था मिलाइने भएको छ ।
बन्दीहरूलाई दिइने सीधावापतको रकम समयमै भुक्तानीका लागि बाल सुधार गृहले आवश्यक विवरण समयमै कारागार कार्यालयमा पेश गर्ने व्यवस्था मिलाइने निर्णय भएको छ । बालबालिकाहरूको शिक्षालाई निरन्तरता दिन पाठ्यपुस्तक र अन्य सन्दर्भ सामग्रीको व्यवस्थापन PABSON, N-PABSON लगायतका सरोकारवालाहरूसँग समन्वय गरी शिक्षा विकास तथा समन्वय इकाइ कार्यालयले उपलब्ध गराउने भएको छ।
ज्ञान आर्जनका लागि पुस्तकालयको व्यवस्था गरी सञ्चालन गर्न बाल सुधार गृह प्रशासकले आवश्यक स्थानको प्रबन्ध मिलाउने भएका छन्। पढ्न इच्छुक बालबालिकाहरूका लागि तहगत रूपमा शिक्षकको व्यवस्थापन खुला विद्यालयमार्फत वीरगंज महानगरपालिकाले गर्ने भएको छ ।
खानेपानीको समस्यालाई दीर्घकालीन रूपमा समाधान गर्न बाल सुधार गृह परिसर नजिकै रहेको डिप बोरिङ्गबाट पाइप जडान गरी नियमित रूपमा खानेपानीको व्यवस्थापन वीरगंज महानगरपालिकाले मिलाउने भएको छ । रातको समयमा बत्ती जाने समस्यालाई हल गर्न वैकल्पिक ऊर्जाको व्यवस्थापनका लागि वीरगंज उद्योग वाणिज्य संघलाई अनुरोध गरिने भएको छ ।
बाल सुधार गृहको सुरक्षा व्यवस्थालाई थप प्रभावकारी बनाउन आवश्यक पर्ने CCTV क्यामेरा जडान गर्ने व्यवस्था वीरगंज महानगरपालिकाले गर्ने भएको छ । आगामी दिनमा अनुगमन र निरीक्षणलाई थप व्यवस्थित र प्रभावकारी बनाइने र अनाधिकृत व्यक्तिहरूको प्रवेशलाई निरुत्साहित गरिने भएको छ ।
जिल्ला प्रशासन कार्यालयले यी निर्णयहरूको कार्यान्वयनलाई प्राथमिकता दिँदै बाल सुधार गृहमा रहेका बालबालिकाहरूको सुरक्षित र सहज जीवनयापनका लागि आवश्यक सबै कदम चाल्ने प्रतिबद्धता व्यक्त गरेको प्रमुख जिल्ला अधिकारी गणेश अर्यालले बताए ।
बैठकमा प्रमुख जिल्ला अधिकारी अर्यालले बाल सुधार गृहका कर्मचारीलाई गम्भीर भएर आफ्नो दायित्व पूरा गर्न निर्देशन पनि दिए । उनले बाल सुधारमा रहेकाहरुसँग एकदमै नरम व्यवहार र मानवीयता दर्शाउन निर्देशन दिदै त्यहाँको सबै समस्याहरु तत्काल सम्बोधन हुने गरी काम गर्न र बाल विज्याईहरुलाई कुनै प्रकारको तनाव हुने खालको काम नगर्न निर्देशन दिए ।
बैठकमा सहायक प्रमुख जिल्ला अधिकारी निशानराज गौतम, सुमन कुमार कार्की, वीरगन्ज महानगरपालिकाका प्रमुख प्रशासकीय अधिकृत अरविन्दलाल कर्ण, शिक्षा विकास समन्वय इकाई पर्साका प्रमुख हरि राउत, कोष तथा नियन्त्रण कार्यालय पर्साका प्रमुख, वीरगन्ज कारागारका प्रमुख, मनोसामाजिक परामर्शदाता तथा बाल सुधार गृहका कर्मचारीहरु लगायतको सहभागिता रहेको थियो ।
