काठमाडौँ । नेपाल विद्युत प्राधिकरणका कार्यकारी निर्देशक कुलमान घिसिङले उद्योगहरूमा लोडसेडिङ हुने समस्या एक महिनाभित्रै समाधान हुने बताएका छन् ।
भारतबाट १२ घण्टा मात्रै विद्युत आयात भएकाले अहिले उद्योगहरूमा धेरै समस्या देखिएकाले चाँडै समस्या समाधान हुने उनले बताए ।केही दिनदेखि देशभर लोडसेडिङ हुने हल्ला फैल्याए पनि कुनै पनि हालतमा लोडसेडिङ नहुने उनले जिकिर गरे । लोडसेडिङ अहिले पनि नभएको र अब पनि नहुने अवस्था नभएको उनले दाबी गरे । ‘लोडसेडिङ भएको छैन, हुँदा पनि हुँदैन । हाम्रा सबै पावरप्लान्टहरू राति चल्छन् । भारतबाट दिउँसो बिजुली आयात गर्न दिएकै छ, दिउँसो आउँछ । त्यसकारण लोडसेडिङ हुँदैन । सबैजना लोडसेडिङ नहुनेमा ढुक्क हुन आग्रह छ ।’
उनका अनुसार एक हजार मेगावाट बढीका आयोजना राति पूर्ण क्षमतामा चल्ने भएकाले पनि लोडसेडिङ नहुने अवस्था छ । यस्तो खालको समस्या बढीमा डेढ महिना मात्रै रहने उनले जानकारी दिए ।
उनका अनुसार नेपालमा पिक टाइममा करिब १८ र १९ सय मेगावाट बिजुलीको माग भएअनुसार प्राधिकरणले आवश्यक व्यवस्थापन मिलाउँदै आएको छ ।
उनले केही उद्योगमा पिक टाइममा कटौती भएको बताए । घरायसी ग्राहकलाई लोडसेडिङ हुन नदिन केही समय उद्योगमा विद्युत कटौती भएको भने उनले स्वीकारे ।
६ बजेपछिका लागि पनि भारतसँग विद्युत आयात माग गरिरहेको उनले बताए । एक दुई घण्टा विद्युत् कटौती हुँदा पनि उद्योगहरूले १२ घण्टा लोडसेडिङ भएको भनेर हल्ला गरेका उनले आरोप लगाए ।
उद्योगमा लोडसेडिङबारे कुलमान घिसिङः
ट्रकलाइन र डेडिकेटेड लाइनको वक्यौता नतिर्ने उद्योगहरूको पहिलो प्राथमिकतामा कटौती गर्दै जान्छौँ । त्यसले पनि नपुगेको अवस्थामा अरुमा पनि कटौती गर्दै जानुपर्छ । तर यो समस्या भारतसँग राति पनि विद्युत बिट गर्न दिनको लागि आग्रह गरिएको छ । भारतले दियो भने रातको समयमा विद्युत कटौती हुने अवस्था आउँदैन । दिउँसो सबै उद्योगलाई विद्युत दिएका छौँ ।
अहिलेको समस्या भनेको छोटो समयको समस्या हो । एक महिनादेखि डेढ महिनाको समय मात्रै हो । वैशाख १५ गतेबाट नेपालभित्रै विद्युत उत्पादन बढ्दै जान्छ । जेठ महिनामा प्राधिकरणले निर्यात नै गर्नुपर्छ । उत्पादन बढी हुन्छ । डेढ महिनाका लागि बढी हल्ला गर्नुपर्ने अवस्था होइन । गत वर्ष पनि उद्योगहरूलाई विद्युत नपुग्दा उद्योगहरूलाई केही व्यवस्थापन गर्न भनेकै हो ।
लोड एकैनास बस्दैन । हरेक दिन लोड बढेको बढेकै छ । चार देखि पाँच गुणा लोड बढेको छ । विद्युत सप्लाई पनि बढेको छ । म्याच गर्नको लागि प्राधिकरणले व्यवस्थापन गरेको हुन्छ । अलिकति सप्लाई पुगेन भने त्यो किसिमको व्यवस्थापन गर्नुपर्छ । प्राधिकरणले विस्तारै व्यवस्थापन गर्छौँ । त्यसमा समस्या हुँदैन ।
उद्योगीहरूलाई दिउँसो सबै विद्युत दिएका छौँ । सकेसम्म दिइरहेका छौँ । २४ घण्टा कुनै पनि उद्योगहरू चल्दैनन् । वर्षायाममा २४ घण्टा विद्युत दिँदा पनि १२ घण्टा उद्योग चलाउँदैनन् । जुन वेला एक घण्टा विद्युत भएन भने हल्ला गर्नुहुन्छ, त्यो पनि राम्रो भएन । प्राधिकरणले २४ घण्टा विद्युत दिएका हुन्छौँ ।
उद्योग चलाउनु हुँदैन । विद्युत त्यतिकै खेरा फाल्नुपर्ने हुन्छ । जुन वेला एकदेखि दुई घण्टा लोडसेडिङ हुँदा १२ घण्टा भनेर हल्ला गर्ने काम पनि भएन । विद्युत सप्लाईको अवस्था कस्तो हो भन्ने कुरा सबैलाई थाहा छ । बोलेर मात्रै राम्रो हुँदैन । प्राधिकरणले व्यवस्थापन गर्दै जाने हो । केही समय समस्या हुँदैन । विस्तारै समाधान हुँदै जान्छ । जुन उद्योगको हकमा हो । अरू उपभोक्ताहरूको हकमा कहीँ पनि केही हुँदैन । लोडसेडिङ हुँदैन । विद्युत उत्पादन बढ्दै जान्छ । समस्या पनि समाधान हुँदै जान्छ ।
