वीरगन्ज । वीरगन्जका निजीक्षेत्रको छाता संगठन वीरगन्ज उद्योग वाणिज्य संघको नयाँ नेतृत्वका लागि मंगलबार मनोनयन दर्ता सम्पन्न भएको छ । संघको २८ गते सम्पन्न ४९ औं साधारसभा सम्पन्न पश्चात नयाँ नेतृत्वको प्रकृया शुरु भएको हो ।
प्रकृया अनुसार निर्वाचनका लागि मंगलबार मनोनयन दर्ता सम्पन्न भएको छ । निर्वाचन अधिकृत अधिवक्ता बालमुकुन्द खरेलका अनुसार बिहान साढे ११ बजेदेखि दिउँसो ३ बजेसम्म तोकिएको मनोनयन दर्ताको समयसम्ममा ६८ जनाको उम्मेदवार परेको थियो ।
अधिवक्ता खरेलका अनुसार वाणिज्यतर्फ १५ वटा पदका लागि २९ जनाको उम्मेदवारी परेको छ । उद्योगतर्फ १३ पदका लागि २६ जनाको उम्मेदवारी परेको छ । एशोसिएटतर्फ ६ पदका लागि १२ जनाको उम्मेदवारी परेको छ ।
त्यस्तै एफिलेसन अर्थात वस्तुगततर्फ १ पदमा एकजनाको मात्रै उम्मेदवारी परेको निर्वाचन अधिकृत खरेलले बताए । उम्मेदवारी मनोनयनको समय सकिएपछि उम्मेदवारहरुको अन्तिम नामावली प्रकाशन गरिएको छ ।
अब उम्मेदवारी फिर्ता लिने काम ७ गते बिहीबार हुने छ । मतदान भने चैत ९ गतेका लागि तोकिएको छ । संघको विधान अनुसार पहिले ३५ जना कार्यकारिणी समिति सदस्य चयन हुने । त्यस मध्यबाट पदाधिकारी चयन हुनेछ ।
३५ जना कार्यकारिणी समितिका लागि अहिले ६८ जनाको उम्मेदवारी परेको छ ।
