वीरगञ्ज । बारा प्रहरीले १३ किलो लागू औषध गाँजा सहित एक महिलाई पक्राउ गरेको छ । पक्राउ पर्नेमा मकवानपुरको राक्सिराङ गाउँपालिका वडा नम्बर–१ बस्ने अन्दाजी ५० की सुशिला गोले रहेकी छिन् ।
उनको साथबाट २ पोकामा रहेको १३ किलो गाँजा बरामद गरेको हो । विशेष सूचनाको आधारमा हेटौडाबाट वीरगंजतर्फ आउदै गरेको ना ४ ख ६०६१ नम्बरको यात्रुबाहक माईक्रो बसलाई रोकेर चेकजाँच माईक्रोमा सवार गोलेको साथमा रहेको २ वटा बोरा प्रतिबन्धित लागु औषध गाँजा बरामद गरेको बारा प्रहरीका सूचना अधिकारी प्रहरी नायव उपरीक्षक विजयराज पण्डितले जानकारी दिए ।
उनलाई जीतपुरसिमरा उपमहानगरपालिका वडा नमबर–३ बजनी वीररगंज पथलैया सडकको अस्थाई प्रहरी पोष्ट, रामबन बाराबाट खटिएको प्रहरी टोलीले पक्राउ गरेको हो । लागूऔषध गाँजा सहित पक्राउ परेकी उनलाई प्रहरी हिरासतमा राखेर थप अनुसन्धान भईरहेको जिल्ला प्रहरी कार्यालय बाराले जनाएको छ ।
यसैगरी एकहजार पाँचसय पिस प्रतिबन्धित लागू औषध पनि प्रहरीले बरामद गरेको छ । बाराको सिम्रौनगढ नगरपालिका वडा नं.६ स्थित सतुवाई सीमाना एरियामा इलाका प्रहरी कार्यालय सिम्रौनगढ बाराबाट खटिएको प्रहरी टोलीले एकहजार पाँचसय विभिन्न प्रतिबन्धित लागूऔषध हिजो बरामद गरेको हो ।
प्रहरीले पाएको विशेष सूचनाको आधारमा इलाका प्रहरी कार्यालय सिम्रौनगढबाट गस्तिले गस्ती गर्दै जाने क्रममा भारतको घोडासहन तर्फबाट नेपालको सिम्रौनगढ बजारतर्फ आउदै गरेको व्यक्तीले प्रहरीगस्ती टोलीलाई देखेर प्लाष्टिकको बोरा फालेको र भारततर्फ फरार भएको थियो ।
गस्तीमा रहेको प्रहरी टोलीले फरार व्यक्तिले फालेको झोला खोली हेर्दा ५ वटा सानो कार्टुनको पोकामा टेप लगाईएको अवस्थामा रहेको विभिन्न प्रतिबन्धित लागूऔषध बरामद गरेको हो । प्रहरीले बरामद गरेको काटुनको टेप खोलेर हेर्दा डाईजेपाम पाँचसय एम्पुल, नुर्फिन पाँचसय एम्पुल, फेनारगन पाँचसय एम्पुल गरी एकहजार पाँचसय एम्पुल प्रतिबन्धित लागूऔषध बरामद भएको बारा प्रहरी प्रवक्ता प्रहरी नायव उपरीक्षक विजयराज पण्डितले जानकारी दिए ।
यस्तै बारा प्रहरीले २ जना फरार प्रतिवादीलाई पक्राउ गरी बारा जिल्ला अदालतमा हाजिर गराएको छ । बारा जिल्ला अदालत कलैयाबाट विभिन्न मुद्दामा दण्ड सजाय तोकिएका दुईजनालाई पक्राउ गरी अदालतमा हाजिर गराएको हो ।
प्रहरीले चेक अनादर मुद्दामा एक हजार रुपैयाँ जरिवाना नतिरी फरार रहेका कलैया उपमहानगरपालिका–१६ का राघव प्रसाद कानुलाई पक्राउ गरी अदालतमा हाजिर गराएको छ ।
त्यस्तै मोटरसाइकल चोरी मुद्दामा दुई सय रुपैयाँ जरिवाना फैसला भएपनि वेवास्ता गरेर फरार रहेका कलैया उपमहानगरपालिका–२१ का नरेश गिरीलाई प्रहरीले पक्राउ गरेको छ । पक्राउ परेका उनीहरुलाई पक्राउ गरी बारा जिल्ला अदालत कलैयामा दाखिला गरिएको प्रहरीले जनाएको छ ।
