वीरगन्ज । चैत ५ गते हुने स्ववियु निर्वाचनका लागि ठाकुरराम बहुुमुखी क्याम्पसमा अखिल (क्रान्तिकारी)को प्यानल नै उम्मेदवारी दर्ता गरेको छ । स्ववियु सभापतिमा अनिस पटेल र सम्शेर अन्सार सचिवल र भारती पटेल कोषाध्यक्षमा उम्मेदवारी दिएको पूर्व अखिल क्रान्तिकारी नेता प्रभाकर गुप्ताले जानकारी दिए ।
उनका अनुसार सदस्यहरुमा रविन्द्र कुमार गुप्ता, धर्मेन्द्र दहित थारु, अंशुु कुमारी सहनी, भागरती कुमारी पासवान, श्रवण कुमार, प्रदीप पटेल, राकेश कुमार, निर्मल यादव, सुलभ सहनी गरी ११ जनाले प्रत्यक्षमा उम्मेदवारी दिएका छन् ।
१० जना समानुपातिक उम्मेदवार रहेका छन् । २१ सदस्यीय स्ववियु समितिमा समानुपातिकबाट उपसभापतिमा प्रदीप पटेलले एकजना सहसचिवमा उम्मेदवारी दिनुभएको छ । यस्तै वीरगन्ज नर्सिङ कलेजमा अखिल क्रान्तिकारीबाट कविता आचार्य, सचिव सरस्वती श्रेष्ठ र कोषाध्यक्ष अञ्जु सुनारले उम्मेदवारी दर्ता गराएका छन् ।
प्रत्यक्षबाट पाँचजना सदस्य र समानुपातिकाबाट सातजना सदस्यको उम्मेदवारी परेको अखिल क्रान्तिकारीका केन्द्रीय सचिव मिरोज अहमदले जानकारी दिए ।
यसैबीच निर्वाचनका लागि देशभर उम्मेदवारी मनोनयन चलिरहेका बेला केही क्याम्पसमा भने विद्यार्थी संगठनबीच विवादपछि मनोनयन अवरुद्ध भएको छ ।
त्रिभुवन विश्वविद्यालयसँग सम्बन्धन लिएका केही जिल्लाका विद्यार्थी संख्याको हिसाबले साना क्याम्पसहरुमा भने संगठनहरुको सहमतिमा सर्वसम्मत नेतृत्व चयन गरिएको छ ।
आज दिउँसो ३ बजेसम्म प्राप्त विवरण अनुसार एमालेनिकट अनेरास्ववियुले ६ वटा क्याम्पसमा सभापति निर्विरोध पाएको छ । त्यस्तै माओवादी केन्द्रनिकट अखिल क्रान्तिकारीले ३ र कांग्रेस निकट नेविसंघ तथा नेकपा एसनिकट अनेरास्ववियुले एक एक क्याम्पसको सभापति निर्विरोध भएका छन् ।
आंगिक क्याम्पसबाहेक अन्य क्याम्पसहरुको स्ववियु निर्वाचनको परिणाम आधिकारिक रुपमा विश्वविद्यालयले नदिने विद्यार्थी कल्याण शाखाले जनाएको छ । सम्बन्धित क्याम्पसका निर्वाचन समितिले पुष्टि गरेका आधारमा हालसम्म अनेरास्ववियुले ११ वटा क्याम्पसमा विजयी भएको छ ।
