वीरगन्ज । वीरगन्ज पथलैया औद्योगिक करिडोरमा स्थापित औषधि उत्पादन गर्ने उद्योग म्याग्नस फर्मास्युटिकल्सले आँखा र नाकमा लगाउने औषधि उत्पादन शुरु गर्ने भएको छ ।
विभिन्न रोगका दुईसय भन्दा बढी औषधि उत्पादन गर्दै आएको म्याग्नस फार्मास्युटिकल्सले आँखामा लगाउने आईड्रप तथा नाकमा लगाउने नजल ड्रप उत्पादन गर्ने अत्याधुनिक प्लाण्टको स्थापना गरेको छ ।
अहिले उत्पादनको परीक्षणकाल चलिरहेकोले चाडै उत्पादन बजारमा ल्याउने कम्पनीले जनाएको छ ।
कम्पनीले आज काठमाडौं र वीरगन्जका पत्रकारहरुलाई उद्योगको भ्रमण समेत गराएको छ ।
पत्रकारहरुलाई उद्योगमा भ्रमण गराउने क्रममा कम्पनीले उत्पादन गर्न प्रयोग गर्ने कच्चा पदार्थ, उत्पादन प्रकृया, उत्पादनका लागि अपनाईने स्वास्थ्य सुरक्षाको मापदण्ड, भण्डारण, प्रशोधन, अनुसन्धान परीक्षण र उत्पादित वस्तुको बजारमा पु-याउने लगायतका विषयमा सञ्चारकर्मीहरुलाई जानकारी गराएको छ ।
कम्पनीले नेपालमै पहिलो पटक अत्याधुनिक उत्पादन प्लाण्टबाट नजल उत्पादन गर्न लागिएकोले सञ्चारकर्मीहरुलाई उद्योगको भ्रमण गराएको जनाएको छ ।
