वीरगन्ज । पर्सामा संस्थागत विद्यालय र तीनका संगठनहरुबीच खेलकुद प्रतियोगितामा प्रतिस्पर्धा नै चलेको छ । संस्थागत विद्यालयहरुले विद्यालय स्तरको अन्तर विद्यालय र संस्थागत रुपमा पनि खेलकुद प्रतियोगिताको आयोजना गरेका छन् ।
नीजि तथा आवासीय विद्यालय संगठन (प्याब्सन) पर्सा र वीरगन्ज महानगरबीच मात्रै होईन निजी विद्यालय स्तरमा पनि खेलकुद प्रतियोगिताको आयोजना गर्ने प्रतिस्पर्धा चलेको छ ।
प्याब्सन पर्सा जिल्ला कमिटिले आयोजना गरेको अन्तर विद्यालय क्रिकेट प्रतियोगिताको नवौं संस्करण बुधबार सम्पन्न भएको छ ।
बुधबार सम्पन्न प्रतियोगिताको उपाधि मुनलाईट माविले उचालेको छ ।
नारायणी रंगशाला स्थित टीबी साह क्रिकेट मैदानमा आज भएको फाईनल खेलमा विद्यासागर माविलाई १७ रनले पराजित गर्दै मुनलाईट माविले यसबर्षको प्याब्सन अन्तर विद्यालय क्रिकेट प्रतियोगिताको उपाधि जितेको हो ।
फाईनल खेलमा टस जितेर पहिले व्याटिङ गरेको मुनलाईट माविले १७.४ ओभरमा सबै विकेट गुमाएर ११३ रनको योगफल तयार पारेको थियो । ११४ रनको लक्ष्य सहित जवाफी व्याटिङ गरेको विद्यासागर माविले पूरा ओभर खेल्दै ८ विकेटको क्षतिमा ९६ रन मात्रै बनाउन सक्यो ।
खेलको म्यान अफ द म्याच, म्यान अफ द टुर्नामेण्ट, बेष्ट व्याटर र बेष्ट बलर एउटै खेलाडी विद्यासागर माविका सेराज हवारीले पाएका छन् । त्यस्तै वेष्ट विकेट किपर मुनलाईटका अनुप कुमार, वेष्ट फिल्डर विद्यासागरका दिलराजन यादव र इमार्जिङ प्लेयर विद्यासागरकै जुनैद आलम घोषित भएका छन् ।
प्रतियोगितामा विद्यासागर दोश्रो र साउथजोन मावि तेश्रो भएका छन् । विजेता खेलाडीहरुलाई समापन समारोहका प्रमुख अतिथि संघीय सांसद तथा पूर्व वनमन्त्री डा.विरेन्द्र प्रसाद महतोले शील्ड, मेडल र प्रमाणपत्र वितरण गरेका थिए ।
प्याब्सन पर्साका अध्यक्ष सरोज प्रसाद चौधरीको अध्यक्षतामा प्रतियोगिताको समापन समारोह सम्पन्न भएको थियो । यसैगरी फागुन ३ गतेदेखि प्याब्सन महानगर कमिटिले आयोजना गरेको सम्भवतः नेपालमै पहिलो अन्तर विद्यालय छात्रा क्रिकेट प्रतियोगिता र १२ बर्षमुनीको पनि अन्तर विद्यालय क्रिकेट प्रतियोगिता मंगलबार सम्पन्न भएको छ ।
मंगलबार सम्पन्न प्याब्सन महानगर अन्तर विद्यालय छात्रा क्रिकेटको उपाधि गौतम माविले हात पारेको छ । प्याब्सन महानगर कमिटीले १२ बर्षमुनीको क्रिकेट र छात्रा क्रिकेट प्रतियोगिताको आयोजना गरेको थियो । त्यसअघि सनलाईट माविले पनि टी–२० क्रिकेट प्रतियोगिताको आयोजना गरेको थियो ।
प्याव्सन पर्साले नै जुनियर फुटवल प्रतियोगिताको पनि आयोजना गरेको थियो प्रतियोगिताको उपाधी लिटिल फ्लावरले उचालेको छ । प्रतियोगिताको फाइनल खेलमा अर्को दावेदार टिम नवदिप एकेडमीलाई ४–० गोलले पछि पार्दै लिटिल फ्लावरले यो उपाधी उचालेको हो ।
प्याब्सन पर्साले फागुन ५ गतेदेखि आयोजना गरेको फुटबल प्रतियोगितामा कुल २० वटा विद्यालयका २० टिम सहभागिता जनाएको प्याब्सन पर्साका सचिव अशोक संग्रौलाले जानकारी दिए ।
विद्यालय तहबाट नै खेलाडी उत्पादन गर्ने लक्ष्य सहित प्रतियोगिताको आयोजना गरेको प्याब्सन पर्साका अध्यक्ष सरोज प्रसाद चौधरीले बताए ।
विद्यालयहरुले आन्तरिक र अन्तर विद्यालय तथा विद्यालयहरुको छाता संगठनले पनि अन्तर विद्यालयस्तरीय प्रतियोगिताको आयोजना गरेर खेलाडीहरुमा शारिरिक र मानसिक विकासमा ठूलो योगदान गरेको क्रिकेट संघ पर्साका सदस्य वासुदेवलाल कर्णले बताए ।
खेलकुद शरीरलाई आवश्यक हुने भएकोले खेलकुदले शारिरिक व्यायाम पनि हुने भएकोले यसले विद्यार्थीहरुको मानसिक र शारिरक विकासमा मद्दत पुग्ने उनको भनाई छ ।
शारिरिक व्यायामले शरीरलाई स्वस्थ राख्ने र मानसिक व्यायामले अनुशासनमा रहन सिकाउने भएकोले विद्यालयहरुले आयोजना गर्ने प्रतियोगिता विद्यार्थीहरुको लागि शिक्षा नै भएको कर्णको भनाई छ ।
पछिल्लो समयमा खेलकुदमा खासगरी क्रिकेटमा नेपालले गरेको प्रगतिले आकर्षण अझै बढेकोलेपनि प्रतियोगिताहरु निरन्तर भईरहेको छ । खेलकुद प्रतियोगितामा सहभागी हुने विद्यार्थीहरुले जित्ने रणनीति बनाउने भएकोले पनि यसले आफूलाई रणनीतिकारको रुपमा विकास गर्न र खेलकुदकै माध्यमबाट पनि आर्थिक उन्नतीहरु गर्नसक्ने सम्भावनाहरुको ढोका खोल्न सक्ने क्रिकेट संघ पर्साका सदस्य वासुदेवलाल कर्ण बताउछन् ।
विद्यालयहरुले खेलकुदलाई प्राथामिकता दिएर आयोजना गरिएको प्रतियोगिता अत्यन्तै सराहनीय रहेपनि यसको समन्वय र सहकार्य अझ बढी महत्वपूर्ण रहेको प्याब्सनका केन्द्रीय सदस्य छेडुप लामाको भनाई छ ।
उनले भने, ‘विद्यालयहरुले संस्थागत रुपमै खेलकुद प्रतियोगिता गर्नु राम्रै हो । यसले विद्यार्थीहरुलाई नै फाईदा हुन्छ । तर, अझ समय मिलाएर गरेको भए प्रतिस्पर्धा अझ रोमाञ्चक हुन्थ्यो ।’
वीरगन्जका विद्यालयहरुले अतिरिक्त क्रियाकलाप निरन्तर गर्दै आईरहेका छन् । महानगरस्तर र जिल्ला स्तरमा भएको खेलकुद प्रतियोगितामा सहभागी हुने विद्यालय र विद्यार्थीहरु एउटै हुन्छन् ।
त्यसमा विद्यालय र विद्यार्थीको समय व्यावस्थापनमा दबाव पुग्छ । यसमा चाहिँ सबैले विचार गर्नुपर्ने केन्द्रीय सदस्य लामाको धारणा छ ।
