सिरहा । सिरहामा एक परिवारले लाखौं मूल्य बराबरको जग्गा दान गरेका छन् । गोलबजार नगरपालिका–७ निवासी केदार श्रेष्ठ, हिरालाल श्रेष्ठ, मोतिलाल श्रेष्ठ, जवाहरलाल श्रेष्ठ, तथा डा.बिष्णु प्रसाद श्रेष्ठको संयुक्त नाममा रहेको करिब ५० लाख रुपैयाँ मूल्य बराबरको एक कठ्ठा घडेरी जग्गा ब्रह्माकुमारी राजयोग पाठशाला, चोहर्वाको निर्माणका लागि दान गरेका हुन्।
शनिबार आयोजित एक विशेष समारोहमा पूर्व कानुनमन्त्री लीला नाथ श्रेष्ठ, गोलबजार नगरपालिकाका नगरप्रमुख श्याम कुमार श्रेष्ठ, ब्रह्माकुमारी राजयोग सेवा केन्द्र नेपालका निर्देशक राजयोगिनी ब्रह्माकुमारी डा. राज दादी, तथा जिल्ला समन्वय समिति सिरहाका उपसभापति दिलीप कुमार लामाले संयुक्त रूपमा पाठशालाको शिलान्यास गरे।
कार्यक्रमलाई सम्बोधन गर्दै नगरप्रमुख श्रेष्ठले समाजसेवी मोती श्रेष्ठको योगदानको प्रशंसा गर्दै शिक्षा, योग तथा आध्यात्मिक चेतनाको प्रवर्द्धनमा यस्तो कार्य महत्वपूर्ण हुने बताए। गोलबजार नगर पालिकाले उहाँ हरुले गर्नु भएको यस कार्य नगरले सधै सम्झिने र आफ्नो तर्फ र गोलबजार नगर पालिकाको समेत तर्फबाट जग्गा दाता श्रेष्ठ परिवारलाई धन्यवाद ज्ञापन गरे।
पूर्व कानुनमन्त्री श्रेष्ठले पनि समाज सुधारका लागि दान र सेवाभावको आवश्यकता रहेको उल्लेख गर्दै श्रेष्ठ परिवारले गरेको यो दानले समाजमा एउटा सकारात्मक उर्जा थपेको बताए । उनले भने, ‘हामीले के लिएर आयौ र के छाडेर जाँदै छौ भन्ने भोलीका उहाँका पुस्ताहरुले गर्व गर्ने काम भएको छ । यो सराहनीय कार्य गरेकोमा समाजसेवी श्रेष्ठ परिवार प्रति म हार्दिक कृतज्ञता व्यक्त गर्दछु ।’
जग्गा दाता समाजसेवी मोती श्रेष्ठले धार्मिक, सामाजिक तथा नैतिक शिक्षाको प्रवर्द्धनका लागि यो योगदान गरेको र हाम्रो परिवारले यस क्षेत्रमा विद्यालय, स्वास्थ्य चौकी, अस्पताल तथा मानव सेवा आश्रमहरूका लागि हालसम्म करिब २० करोड मूल्य बराबरको जग्गा दान गरिसकेको समेत स्मरण गराए।
यस क्षेत्रका युवा नेता,समाजसेवी तथा श्रेष्ठ परिवारका सदस्य ज्ञान कुमार श्रेष्ठले आफ्नो परिवार बाट समाजसेवामा आफ्नो परिवारले गरेको यस कार्यले आफू गर्वान्तित भएको महसुस गर्नुका साथै यस क्षेत्रकालागी आफुले सक्दो सहयोग सधै गरि रहने समेत बताए ।
