वीरगन्ज । जिल्ला प्रहरी कार्यालय पर्साले सात लाख हुण्डीको रकम सहित एकजनालाई पक्राउ गरेको छ । पक्राउ पर्नेमा पर्साको विन्दवासिनी गाउँपालिका वडा नं.–३ झौवा बस्ने वर्ष ४३ का अजय कुमार साह रहेका छन् ।
विशेष सूचनाको आधारमा जिल्ला प्रहरी कार्यालय पर्साबाट खटिएको प्रहरी टोलीले वीरगञ्ज महानगरपालिका वडा नं.–१० आदर्शनगर स्थित ग्लोबल आईएमई बैंक नजिक बाट उनलाई हुण्डीको रकम सहित पक्राउ गरेको जिल्ला प्रहरी कार्यालय पर्साका प्रवक्ता प्रहरी नायव उपरीक्षक किशोर लम्सालले जानकारी दिए ।
शंका लागेर चेकजाँच गर्ने क्रmमा उनले लगाएको सेतो ट्याक्सुटको दुबै साईडको खल्तीमा लुकाएर ल्याएको नेपाली एकहजार दरका नोट ७ सय थानको सात लाख रुपैंया नगद फेला परेको प्रहरी नायव उपरीक्षक लम्सालले जनाए ।
बरामद रकम सहित अजय कुमार साहलाई नियन्त्रणमा लिएर मुलुकी अपराध संहिता, २०७४ को दफा १२५ को (क) बमोजिम (हुण्डी सम्बन्धी कारोबार गर्न नहुने) कसूरमा थप अनुसन्धान भईरहेको जनाएको छ ।
