वीरगन्ज । गौतम माध्यामिक विद्यालयले आयोजना गरेको अन्तर विद्यालय बाल फुटबल प्रतियोगितामा मिनिल्याण्ड मावि, ओम नेशनल र जीवनज्योती माविले विजयी शुरुवात गरेको छ ।
गौतम माध्यामिक विद्यालयको ४८ औं बार्षिकोत्सवको अवसरमा आयोजना गरेको अन्तर विद्यालय बाल फुटबल प्रतियोगिताको उदघाटन खेलमा तीनवटा विद्यालयले विजयी शुरुवात गरेको हो ।
जिल्ला प्रहरी कार्यालय पर्साको पूर्वतर्फ रहेको विपद व्यावस्थापन गुल्मको मैदानमा बिहीबारबाट शुरु भएको फुटबल प्रतियोगिताको पहिलो खेलमा न्यू वेभ मावि र मिनील्याण्डबीच भएको थियो ।
दुई विद्यालयबीचको खेल १–१ को बराबरी भएपछि खेल पेनाल्टी सुटआउटमा गएको थियो । मिनील्याण्ड माविले १–० को पेनाल्टी सुटआउटमा जित निकालेको हो । पहिलो खेलको म्यान अफ दी म्याच न्यू वेभका रविराज घोषित भए ।
त्यस्तै ओम नेशनल मावि र माउण्ट मकालु माविबीच भएको दोश्रो खेलमा ओम नेशनल विजयी भएको छ । ओम नेशनलले पनि माउण्ट मकालुलाई १–० ले पराजित गरेको हो । म्यान अफ दी म्याच माउण्ट मकालुका प्रिन्स रौनियार घोषित भए ।
त्यस्तै ज्ञानज्योती मावि र जीवनज्योती माविबीच भएको तेश्रो खेलमा जीवनज्योती २–१ गोलले विजयी भएको छ । खेलको म्यान अफ दी म्याच जीवनज्योती कै नवल यादव घोषित भए ।
यसअघि प्रतियोगिताको प्रमुख अतिथि जिल्ला प्रहरी कार्यालय पर्साका प्रमुख प्रहरी उपरीक्षक कुमोध ढुंगेलले पेनाल्टी सुट हानेर र विशिष्ट अतिथि नेशनल इन्फोटेक कलेजका निर्देशक मनिष सिंहले गोलरक्षक बनेर खेलको उदघाटन गरेको थियो । गौतम माध्यामिक विद्यालयका निर्देशक सोनाम लामाको अध्यक्षतामा भएको उदघाटन कार्यक्रममा विद्यालयकी सहायक प्रिन्सिपल परीक्षा पिया लामाले स्वागत मन्तव्य व्यक्त गरेकी थिईन् ।
कार्यक्रमको सहजीकरण विद्यालयका शिक्षक सौराज प्रधानले गरेका थिए । प्रतियोगितामा वीरगन्जका १५ वटा विद्यालयका जुनियर टिमको सहभागिता रहेको छ ।
प्रतियोगितामा आयोजक गौतम स्कुलसँगै मिनील्यान्ड सेकेन्डरी स्कुल, न्यु वेभ एकेडेमी, माउन्ट मकालु स्कुल, ओम नेशनल एकेडेमी, लिटिल फ्ल्वार स्कुल, ज्ञानदा एकेडेमी, मनोकामना सेकेन्ड्री स्कुल, सन साइन सेकेन्ड्री स्कुल, मालिनी सेकेन्ड्री स्कुल, सन लाइट स्कुल, ज्ञान ज्योति स्कुल, जीवन ज्योति स्कुल, लिटिल एन्जल स्कुल र एसआर ग्यालेक्सी स्कुलले प्रतियोगितामा सहभागिता जनाएका छन् ।
१५ टिमलाई दुई समूहमा विभाजन गरि खेलाईएको छ । दुई समूह बनाउदा मनकामना माविले भने बाई पाएको छ । खेल अवधिभर उत्कृष्ट खेलाडी, बेस्ट फरवार्ड, बेस्ट डिफेन्डर, अनुशासन टोली, उत्कृष्ट फिल्ड तथा अन्य विधाहरूमा पुरस्कार, शिल्ड र प्रमाणपत्र प्रदान गरिने प्रधानले जानकारी दिए ।
प्रतियोगिताका उत्कृष्ट प्रदर्शन गर्ने रेफ्री र प्रशिक्षकलाई पनि सम्मान गरिने गौतम माविका एकाडेमिक हेड रमेश शर्माले जानकारी दिए । शुक्रबार लिटिल फ्लावर मावि र ज्ञानदा एकेडेमी, गौतम मावि र सनसाईन, मालिनी र सनलाइट तथा लिटिल एञ्जल र एस.आर.ग्यालेक्सी माविबीच खेल हुनेछ ।
