वीरगन्ज। निजी तथा आवासीय विद्यालय अर्गनाईजेशन (प्याब्सन) पर्साको अध्यक्षमा सरोज चौधरी निर्वाचित भएका छन् । आइतबार सम्पन्न प्याब्सन पर्साको १६ औँ अधिवेशनमा चौधरीले प्रतिस्पर्धी शिव गुप्तालाई ४ मतले पराजित गर्दै अध्यक्षमा निर्वाचित भएका हुन् ।
जम्मा खसेको ४८ मत मध्ये चौधरीले २६ मत प्राप्त गरेका थिए । शिवप्रसाद गुप्ताले २२ मत प्राप्त गरे । चौधरी साउथ जोन माध्यमिक विद्यालयका प्रधानाध्यापक हुन् । चौधरी यसअघि वरिष्ठ उपाध्यक्ष थिए भने गुप्ता उपाध्यक्ष थिए ।
सहमतिमा बरिष्ठ उपाध्यक्षलाई नेतृत्व दिनुपर्नेमा गुप्ताले यसअघिको परिपाटी तोड्दै अध्यक्षमा आकांक्षा देखाएपछि निर्वाचनमा जानु परेको थियो । सहमतिमा गएमा गुप्ता बरिष्ठ उपाध्यक्षमा स्वतः निर्वाचित हुने थिए ।
अध्यक्षमा प्रतिस्पर्धा गर्न मैदानमा आएपनि गुप्ताको चाहाना पूरा हुन सकेन । उनले स्वतः पाउने बरिष्ठ उपाध्यक्ष पद पनि गुमाएका छन् । बरिष्ठ उपाध्यक्षमा सुशीला साह, उपाध्यक्षमा विरेन्द्र साह, सचिवमा अशोक संगौला, कोषाध्यक्षमा प्रवीण चौधरी र सहकोषाध्यक्षमा सुदील पटेल विजयी भएका छन् ।
त्यस्तै सदस्यहरुमा आभाष क्षेत्री, मञ्जु रानाभाट, अर्चना कुमारी लगायत विजयी भएका छन् । सहसचिवमा भने एकजनाको पनि उम्मेदवार नपरेकोले सहमतिमा सहसचिव र अन्य सदस्यहरुको टुंगो लगाउने निर्वाचन संयोजक छेडुप लामाले बताए ।
