वीरगन्ज। वीरगन्ज नाका भएर आउने पर्यटकहरुको संख्या घटेको छ । वीरगन्ज स्थित अध्यागमन कार्यालयको तथ्यांक अनुसार बर्षमा २ हजार ८६ जना पर्यटक नेपाल भित्रिएका छन् ।
सन् २०२४ को जनवरी महिनादेखि डिसेम्बर महिनाको अन्तिम सम्म वीरगन्ज नाकाबाट १ हजार २ सय २१ जना पुरुष र ८ सय ८५ जना महिला गरी २ हजार ८६ जना पर्यटक नेपाल भित्रिएका हुन् । त्यस्तै ८ सय ३५ पुरुष र ७ सय ३९ जना महिला गरी १ हजार ५ सय ७४ जना पर्यटक वीरगन्ज नाका भएर भारततर्फ गएका छन् ।
अध्यागमन कार्यालय वीरगन्जका प्रमुख सुजितकुमार साहका अनुसार वीरगन्ज नाका भएर ८४ देशका पर्यटकहरु नेपाल भित्रिएका छन् । त्यस मध्य सबैभन्दा बढी थाईल्याण्डका पर्यटकहरु रहेका छन् । थाईल्याण्डबाट २ सय १२ जना पर्यटक वीरगन्ज नाकाबाट नेपाल आएका छन् । त्यस्तै सबैभन्दा बढी ७१४ जनापर्यटक भारत गएका छन् ।
वीरगन्ज नाका भएर आउने पर्यटकहरुबाट अध्यागमन कार्यालय वीरगन्जले ७० हजार १२३.३९ डलर अर्थात ९३ लाख ४९ हजार ३९४ रुपैंया ३९ पैसा राजस्व पनि संकलन गरेको अध्यागमन प्रमुख साहले बताए । भारतबाट वीरगन्ज नाका भएर नेपाल प्रवेश गर्नेहरुलाई अनअराईभल भिसा दिएबापत राजस्व संकलन हुने गरेको छ ।
अघिल्लो बर्ष २०२३ को जनवरीदेखि डिसेम्बर ३१ सम्म अध्यागमन कार्यालयमा २ हजार ४१ जना पर्यटक भित्रिएको र १ हजार ४६ जना वीरगन्ज नाकाबाट बाहिरिएका थिए । अघिल्लो बर्ष सबैभन्दा बढी अमेरिकाबाट २ सय ४१ जना पर्यटक वीरगन्ज भित्रिएका थिए । भने, ५ सय ९ जना पर्यटक वीरगन्जबाट भारततर्फ बाहिरिएका थिए ।
अघिल्लो बर्ष अध्यागमन कार्यालयले ७३ हजार ९ सय ७० अमेरिकी डलर अर्थात ९७ लाख १७ हजार ९ सय ७९ राजस्व संकलन गरेको थियो । अघिल्लो बर्षको तुलनामा यसबर्ष पर्यटकको संख्या घट्दा राजस्व संकलन पनि कम भएको छ । पूर्वको काकडभिट्टा नाकामा पनि अध्यागमन कार्यालय सञ्चालनमा आउँदा वीरगन्ज नाकाबाट पर्यटकहरुको संख्या घटेको प्रमुख साहको भनाई छ ।
नेपालको प्रमुख प्रवेशद्वार वीरगन्जलाई आर्थिक तथा औद्योगिक नगरीको रुपमा चिनिएपनि यहाँ पर्यटकहरु भने खासै बस्ने गरेका छैनन् । भारतीय पर्यटकको भरमा रहेको वीरगन्जका होटल तथा पर्यटन व्यावसायी तेश्रो मुलुकका पर्यटकहरुलाई भने आकर्षित गर्ने खालको पूर्वाधार संरचनाहरुका अभाव रहेको बताउछन् ।
पछिल्लो समयमा ठूला ठूलाचारतारे स्तरीय होटलहरु खुले पनि पर्यटकहरुका लागि घुम्ने गन्तव्य स्थल नहुँदा पर्यटक आउन सकेको छैन । अंग्रेजी नयाँबर्षमा भारतसँग जोडिएको वीरगन्जले पर्यटनमा खासै लाभ लिन नसकेको होटल तथा पर्यटन व्यावसायी संघ वीरगन्जका अध्यक्ष हरि पन्तले बताए ।
वीरगन्जमा एक दिन भएपनि पर्यटकलाई स्टे गराउने वातावरण निर्माणमा स्थानीय सरकार, प्रदेश सरकार र संघ सरकारको भूमिका नदेखिएको बताए ।
नयाँबर्षको उत्साह र उमंग खासै नदेखिएको भन्दै अन्य स्थानहरुमा पर्यटकहरुको चहलपहल भईरहँदा आर्थिक नगरी वीरगन्ज भने टुलुटुलु हेरेर बस्नुपर्ने विवसता रहेको पन्तको भनाई छ ।
वीरगन्जमा स्तरीय होटलहरु भएपनि माग अनुसारको आपूर्ति हुन नसकेको पन्तले बताए ।
