वीरगन्ज । वीरगन्ज महानगरपालिका वडा नम्बर १५ मा रहेको साउथ सिटी हिमाल अस्पतालले बिरामीसँग बढी रकम लिएको सम्बन्धमा आवश्यक अनुसन्धान गर्न जिल्ला प्रशासन कार्यालय पर्साले जिल्ला प्रहरी कार्यालय पर्सालाई निर्देशन दिएको छ ।
साउथ सिटी हिमाल अस्पताल प्रालिले दुर्घटनामा परी घाईते भएका बिरामीको उपचारमा लाग्ने खर्च अनुचित लिएको भन्दै परेको निवेदनमा आवश्यक अनुसन्धान कारवाही गर्न जिल्ला प्रहरी कार्यालय पर्सालाई पत्राचार गरेको हो ।
मंसिर १७ गते वीरगन्जको बाईपास भिस्वा होटल नजिकै बसबाट ओर्लने क्रममा घाईते भएकी सर्लाहीको मलंगवा नगरपालिका वडा नम्बर ५ भाडसरकी ३७ बर्षीया राजपती कुमारीलाई उपचारका लागि साउथ सिटी हिमाल अस्पतालमा भर्ना गरिएको थियो ।
अस्पतालमा उपचार शुरु भएपछि घाईतेको स्वास्थ्य अवस्था सामान्य देखिएको र मंसिर १८ गते पीडित पक्ष र सवारीधनीबीच सहमति गर्न वडा प्रहरी कार्यालय श्रीपूरमा समेत बोलाउदा पीडित पक्ष आएको थिएन । पीडित पक्षले हस्पिटल खर्चको नाममा दुईदिनको मात्रै ९५ हजार ६ सय रुपैंया, औषधि खर्चमा मात्रै १३ हजार ८ सय ५४ रुपैंया र क्यान्टिनको दुईदिनको खाना र खाजाको मात्रै १० हजार ५ सय रुपैंया सहितको अस्पतालकै लेटर हेडमा लेखेर दिएको छ ।
अस्पतालले भ्याटबिल सहितको रकम उल्लेख गरेर दिनुपर्नेमा अस्पतालको लेटर हेडमा मात्रै लेखेर सवारी धनीबाट असुल्न खोजेपछि ओमसाईराम भलाई कोष तथा इन्भेष्टमेण्ट प्रालिका शाखा इञ्चार्ज विनोद श्रेष्ठले आवश्यक अनुसन्धान कारवाहीका लागि जिल्ला प्रशासन कार्यालय पर्सामा निवेदन दिएका थिए ।
सोही निवेदन उपर आवश्यक अनुसन्धान कारवाही गर्न जिल्ला प्रहरी कार्यालय पर्सालाई जिल्ला प्रशासन कार्यालय पर्साले पत्राचार गरेको हो । निवेदकको उजुरीका आधारमा जिल्ला प्रशासन कार्यालय पर्साले साउथ सिटी हिमाल अस्पताल प्रालिका सञ्चालक रञ्जित चौरसिया, नरेश यादव र राकेश यादवमाथि आवश्यक अनुसन्धान र कारवाही गर्न पत्राचार गरेको हो ।
साउथ सिटी हिमाल अस्पतालका राकेश यादवले भने वीमा कम्पनीमा दावी गर्न रकम उल्लेख गरेर दिन बिरामीले आग्रह गरेपछि लेटर हेडमा लेखेर दिएको बताएका छन् । अस्पतालले मूल्य अभिवृद्धि कर सहितको बिल विजक जारी गर्नुपर्ने भएपनि लेटर हेडम विभिन्न शीर्षकमा रकम उल्लेख गरेर दिनु कानूनत मिल्ने विषय होईन ।
यस्तो बिल अस्पतालले दिन मिल्छ त ? भन्ने प्रश्नमा अस्पतालका राकेश यादवले आफू अस्पतालका कर्मचारी रहेको र दिन नमिल्ने भएपनि मागेपछि दिएको प्रतिक्रिया दिए । हिमाल इन्स्टिच्युट अफ हेल्थ साईन्स एण्ड टेक्नोलोजीको नाममा नर्सिङ तथा सीटीईभीटीको प्राविधिक विषयहरुको अध्यापन गराउदै आएको प्राविधिक शिक्षालयलाई नै अहिले साउथ सिटी हिमाल हस्पिटल प्रालि बनाएको छ ।
नर्सिङ कलेज सञ्चालन गर्नका लागि कम्तीमा एकसय बेडको आफ्नै अस्पताल हुनुपर्ने सरकारले नीति ल्याएपछि हिमाल इन्स्टिच्युट हेल्थ साईन्स एण्ड टेक्नोलोजीमा एकसय बेडको अस्पताल निर्माण गरेर सेवा शुरु गरेको छ । भर्खरै सेवा शुरु गरेको अस्पतालले बिरामीको ढाँड सेक्ने गरी उपचारको नाममा बढी खर्च देखाई ठगी गर्न खोजेको निवेदकको आरोप छ ।
साउथ सिटी हिमाल अस्पताल सञ्चालनमा आउनु अघि द हिमाल इन्स्टिच्युट अफ हेल्थ साईन्स एण्ड टेक्नोलोजी सञ्चालनमा रहँदा पनि मनकामना होस्टलको नाममा विद्यार्थीहरुलाई बढी शुल्क लिने गरेको गुनासो आउने गरेको थियो ।
