वीरगन्ज । वीरगन्जमा भएको दुई छुट्टाछुट्टै सवारी दुर्घटनामा दुईजना घाईते भएका छन् । वीरगन्जको पावर हाउस चोकमा बिहीबार दिउँसो भएको ट्रक र मोटरसाईकल दुर्घटनामा एकजना घाईते भएका छन् ।
सिर्सियाबाट पावरहाउसतर्फ आउदै गरेको ना ५ ख ३५७२ नम्बरको कन्टेनर डिब्बा ट्रकमा घण्टाघरबाट गण्डकतर्फ गईरहेको ना ५१ प ४९२३ नम्बरको मोटरसाईकल छिर्दा एकजना घाईते भएको हो । घाईते हुनेमा पर्साको पकाहमैनपुर गाउँपालिका वडा नम्बर १ का ५३ बर्षीय मुनीलाल सहनी रहेका छन् । उनको हात र खुट्टामा चोट लागेर घाईते भएका छन् ।
उनलाई अदालत रोड मै रहेको निलकण्ठ अस्पतालमा उपचारका लागि पठाईएको जिल्ला ट्राफिक प्रहरी कार्यालय पर्साका प्रमुख प्रहरी निरीक्षक लोकराज भट्टले जानकारी दिए । दुर्घटनापछि पुगेको प्रहरीले ट्रक चालक पर्साको वीरगन्ज महानगरपालिका वडा नम्बर २६ बस्ने बर्ष ३४ का कमरुद्दीन अन्सारीलाई नियन्त्रणमा लिएको प्रहरी निरीक्षक भट्टले बताए ।
त्यस्तै बुधबार राति ओम आश्रम नजिकै कार दुर्घटना हुँदा एकजना घाईते भएका छन् । बागमती प्रदेश ०३० च ८६२३ नम्बरको कार नेशनल ट्रेडिङबाट कृषि अनुसन्धान केन्द्र रानीघाटतर्फ जादै गर्दा ओम आश्रम नजिकै घुम्तीमा बिजुलीको पोलमा कार ठोक्किएर दुर्घटना हुँदा कारमा सवार दोलखा जिल्लाको बट्टेश्वर गाउँपालिका वडा नम्बर ३ का बस्कर मिझारको २५ बर्षीय छोरा रमेश मिझार घाईते भएका छन् ।
उनको अनुहार र आँखीभुईमा चोट लागेको जिल्ला प्रहरी कार्यालय पर्साका प्रवक्ता प्रहरी नायव उपरीक्षक किशोर लम्सालले जानकारी दिए । कारका चालक भने फरार रहेका छन् । कार अहिलेसम्म दुर्घटनास्थलमै बेवारिसे अवस्थामा रहेको छ ।
