वीरगन्ज । जिल्ला प्रहरी कार्यालय पर्साले एकैदिन विलविजक भन्दा बढी सामान लोड गरेको ट्रक, भन्सार छलि गरेको कपडा तथा लागू औषध सहित एकजनलाई नियन्त्रणमा लिएको छ ।
विशेष सूचनाको आधारमा आईतबार राति वीरगञ्ज महानगरपालिका वडा नं.–८ घण्टाघरचोकबाट ना ६ ख ५५१ नम्बरको मालबाहक ट्रकमा विल विजक भन्दा बढीका खुद्रा तथा औषधी लोड गरेको आशंकामा नियन्त्रणमा लिएर राजस्व अनुसन्धान कार्यालय पथलैया बारामा बुझाएको छ ।
वीरगञ्जबाट कैलालीतर्फ लैजाँदै गरेको उक्त ट्रकमा बिलविजक भन्दा बढी सामान लोड रहेको सूचनाको आधारमा रोकेर चेकजाँच गर्दा ८५ लाख ७० हजार २४० रुपैंया भन्दा बढीका खुद्रा तथा औषधीहरु भेटिएको र थप अनुसन्धान तथा कारवाहीको लागि राजस्व अनुसन्धान कार्यालय पथलैया बारामा बुझाइएको जिल्ला प्रहरी कार्यालय पर्साले जनाएको छ ।
त्यस्तै सोमबार बिहान वीरगन्ज वडा नं.–१० आदर्शनगरबाट २ लाख २० हजार बराबरको लेडिज स्वीटर १५० थान बरामद गरेको छ । भन्सार छली चोरी तस्करी गरी ल्याउदै गरेका लेडिज स्वीटर १५० थान बरामद गरी आवश्यक कारवाहीको लागि भन्सार कार्यालय पर्सामा बुझाएको प्रहरीले जनाएको छ ।
त्यसैगरी प्रहरीले लागू औषध सहित एकजनलाई पक्राउ गरेको छ । वीरगञ्ज महानगरपालिका वडा नं.–१४ गण्डकचोकबाट वडा नम्बर २५ का राज महम्मद देवानलाई प्रहरीले आईतबार राति नै पक्राउ गरेको हो ।
प्रहरी चौकी गण्डक भएको नियमित चेकिङ टोलीले वीरगञ्जबाट काठमाण्डौतर्फ जाँदै गरेका बा.प्र. ०३–००१ ख २६६६ नम्बरको सार्वजनिक बस रोकेर चेकजाँच गर्दा देवानले सेतो बोराभित्र म्याटले फोल्ड गरेको ब्लांकेटभित्र कालो प्लाष्टिकमा लुकाइ ल्याएको ३ हजार ५ सय ८० एम्पुल प्रतिबन्धित लागूऔषध बरामद गरेको हो ।
देवानको साथबाट नुरफिन ११९५ पिस, डाइजेपाम–१२०० पिस, फेनारगन–११८५ गरी जम्मा ३५८० एम्पुल बरामद भएको पर्सा प्रहरीले जनाएको छ ।
