वीरगन्ज । आर्थिक तथा औद्योगिक नगरी वीरगन्जका व्यापारीले हरेकबर्ष टिपनटापनकै व्यापारमा चित्त बुझाउनुपर्ने नियती बन्दै गएको छ । नेपाल भारतको खुला सीमा तथा सीमापारी नजिकैको बजारमा सस्तोमा सामान पाउने भएपछि सबै ग्राहकहरु पारी नै जाने गर्दा वीरगन्जका व्यारारीहरुको व्यापार टिपनटापन मै सीमित हुने गरेको हो ।
चारबर्ष अघि विश्वव्यापी महामारीको रुपमा फैलिएको कोभिड–१९ संक्रमणको समयमा वीरगन्जका व्यापारीहरुलाई निकै राम्रो भएपनि त्यसयता भने हरेक दिन ग्राहक कुरेर बस्नु बाहेक केही नहुने गरेको बताएका छन् । खासगरी मधेस आन्दोलनका क्रममा भएको नाकाबन्दीदेखि नै खस्किएको वीरगन्जको व्यापार त्यसयता लयमा फर्किन सकेको छैन ।
मधेस आन्दोलनको बेला अधिकांश सामानहरु ग्रामीण क्षेत्रको बाटो हुदै बाराको जीतपुर, सिमरा लगायतका बजारसम्म पुर्याउने गरेका थिए । त्यहि बेलादेखि वीरगन्जको बजारको व्यापार सुकेको हो । त्यसपछि नेपाल राष्ट्र बैंकले चालूपूँजी कर्जा निर्देशिका जारी गरेर आयातमा लगाएको लगामले पनि व्यापार आधा घटेको थियो ।
महामारीको समयमा वीरगन्ज रक्सोल नाका बन्द हुँदा वीरगन्जका व्यापारीको व्यावसाय राम्रो हुँदा खुशी भएका अहिले भने पारी गुलजार बन्दा वीरगन्जमा टुलुटुलु हेरेर बस्नु परेको बताउछन् । खाद्यान्न लगायतका दैनिक उपभोग्य वस्तु सीमापारी रक्सोलमा सस्तो पर्ने भएपछि सबै ग्राहकहरु रक्सोल जाने गरेका कारण अहिले रक्सोलको बजार गुलजार बनेको छ ।
वीरगन्जको व्यापार भने सुनसान भएको छ । अहिले दशैको मेलामा वीरगन्जको सडकमा जेरी (जिलेबी) प्लाष्टिकका खेलौना र कस्मेटिक सामानहरु बाहेक अन्य सामानहरुमा ग्राहकको भीड देखिएको छैन ।
वीरगन्ज उद्योग वाणिज्य संघले घटस्थापनादेखि सस्तो बजार लगाएपनि सीमापारी रक्सोल बजारकै प्रभावले सस्तो बजारमा पनि ग्राहकको उपस्थिति कम देखिएको छ । सबै उपभोग्य वस्तुहरु रक्सोलमा सस्तो पाउने भएपछि ग्राहकहरु उतै जाने गरेको वीरगन्ज उद्योग वाणिज्य संघका सचिव प्रेमचन्द गोयलले बताए ।
कोरोना महामारीमा देशभर खाद्यान्नको आपूर्ति श्रृंखलालाई सन्तुलनमा राख्न सफल भएको नेपालमा अहिले खाद्यान्नको व्यापारमा पनि कमी आएको नेपाल उद्योग महासंघका केन्द्रीय सदस्य तथा नेपाल चामल तेल संघका निवर्तमान अध्यक्ष डा.सुवोध गुप्ताले बताए । राज्यको नीतिका कारणले पनि आयातित वस्तुहरुसँग प्रतिस्पर्धा गर्न नसकेर वीरगन्जको व्यापार खस्किएको गुप्ता बताउछन् ।
भारतबाट धान आयात पनि रोकिएको र नेपालमा उत्पादित धान पनि सकिएकोले चामल उद्योगहरु बन्द प्रायः रहेको वीरगन्ज उद्योग वाणिज्य संघका कोषाध्यक्ष शिवजी प्रसाद कलवारले बताए । व्यापार नै घटेकोले पनि अहिले वीरगन्जको व्यापार व्यावसायमा उत्साह कम भएको उनको भनाई छ ।
सीमापारी रक्सोलमा सस्तो पाउने भएपछि धेरैजसो पारी जाने र बाँकी रहेका केही उपभोत्ता वीरगन्जमा खुलेको भाटभटेनी स्टोरमा जाने गर्दा पनि बीचमा पर्ने वीरगन्जको बजार चाडपर्वमा पनि सुक्खा जस्तै लागेको सिटी मार्टका सञ्चालक राम लामाले बताए ।
