वीरगन्ज । झूठो विवरण पेश गरेर नागरिकता लिएको आरोपमा बारा प्रहरीले दुईजनालाई पक्राउ गरी अनुसन्धान शुरु गरेको छ । भारतको विहार राज्यको अदापुर निवासी मोजाहिर मियाँ र उनका छोरा नेपाली नागरिकता लिएको विषयमा उजुरी परेपछि बारा प्रहरीले पक्राउ गरेको हो ।
मोजाहिर मियाँ र उनका छोरा सनुल्लाह मंसुरीलाई बारा प्रहरीले चितवनबाट पक्राउ गरेर ल्याएको स्रोतले जनाएको छ । उनीहरुलाई जिल्ला प्रहरी कार्यालय बाराको हिरासतमा राखेर अनुसन्धान भईरहेको बाराका प्रहरी प्रवक्ता प्रहरी नायव उपरीक्षक प्रकाश सापकोटाले नागरिकता मुद्दामा दुईजनालाई पक्राउ गरेर अनुसन्धान भईरहेको बताए ।
मोजाहिर मियाँका अर्का छोरा रायन मन्सुरी भने फरार रहेका छन् । उनले अनुरुल्लाह मंसुरीको नामबाट पनि नागरिकता लिएका छन् । बारा प्रहरीमा परेको उजुरीको आधारमा उनीहरुलाई चितवनबाट पक्राउ गरेको पुष्टि गरेको छ । अदापुर निवासी भारतीय नागरिक मोजाहिर मियाँले आफूले बारा जिल्लाबाट नेपाली नागरिकता लिएर छोराहरुलाई धनुषा र बाराबाट पनि दोहोरो नागरिकता लिएको भेटिएको छ ।
छोरी आयशा खातुनलाई भने पर्सा जिल्लाबाट नागरिकता दिलाएको भेटिएको छ । मोजाहिर हाल चितवनको भरतपुर महानगरपालिका वडा नम्बर ३ कलमनगरमा बस्दै आएका छन् । उनले बारा जिल्लाबाट लिएका छन् । भारतीय नागरिक मोजाहिरले जिल्ला प्रशासन कार्यालय बाराबाट अबास हुसैन बनेर २०६९ बैशाख २९ गते झुठा विवरण पेश गरी नागरिकता लिएका छन् ।
त्यसपछि २०८० जेठ २६ गते प्रतिलिपि समेत लिएको पाईएको छ । मोजाहिरले अबास हुसैनको नाममा लिएको नागरिकतामा बाराको कलैया उपमहानगरपालिका वडा नम्बर १५ उल्लेख गरिएको छ । प्रतिलिपि दिने कर्मचारी जिल्ला प्रशासन कार्यालयकी प्रशासकीय अधिकृत अनिता कुमारी राजबलवट र जारी गर्ने प्रशासकीय अधिकृत विपिन कुमार यादवको नाम उल्लेख गरिएको छ ।
त्यस्तै अबासका छोरा अनुरुल्लाह मन्सुरीले धनुषाको अन्दुपट्टी वडा नम्बर २ को ठेगानाबाट २०६० जेठ २६ गते खटिएको टोलीबाट वंशजको नागरिकता लिएका छन् । उनको नागरिकतामा टोली प्रमुख राजेन्द्र प्रसाद यादवले हस्ताक्षर गरेका छन् । अर्का सनुल्लाह मन्सुरीले पनि धनुषाबाटै नागरिकता लिएका छन् । तर, उनको नागरिकतामा उल्लेख गरिएको ठेगाना भने बेग्लै छ ।
सनुल्लाहको नागरिकतामा लामागढा गुठी वडा नम्बर २ ठेगाना उल्लेख गरिएको छ । उनको पनि बंशजको नागरिकतामा प्रशासकीय अधिकृत विनोद दाहालको हस्ताक्षर छ । सनुल्लाहले २०६४ जेठ २८ गते नागरिकता लिएका हुन् । मोजाहिर आफूले बाराबाट वंशजको नागरिकता लिए । छोराहरुलाई धनुषाको अलग अलग ठेगनाबाट नागरिकता दिलाउन सफल भए ।
उनले छोरीलाई पर्सा जिल्लाबाट नाम परिवर्तन गरेर नागरिकता दिलाए । उनकी छोरी आयशा खातुनलाई मोजाहिरले नसरुद्दीन मियाँ बनेर नागरिकता दिलाएका छन् । छोरीले लिएको नागरिकतामा भने जारी मिति र गर्ने अधिकारीको नाम समेत उल्लेख गरिएको छैन । मोजाहिरको छोराहरु मध्य धनुषाको लामागढा गुठीको ठेगानाबाट नागरिकता लिएका सनुल्लाह मन्सुरीले गण्डकी प्रदेशको पोखराबाट सवारी चालक अनुमति पत्र पनि लिएका छन् ।
भारतीय नागरिक मोजाहिरका छोरा सनुल्लाह र अनुरुल्लाहले बारा जिल्लाबाट पनि अर्को नागरिकता लिएको खुलेको छ । स्रोतका अनुसार सनुल्लाहले रायन मन्सुरीले बाराबाट रायन मंसुरीको नामबाट नागरिकता लिएका छन् । उनले लिएको नागरिकता नम्बर ३३–०१–८१–०४२४५ रहेको छ । त्यस्तै अनुरुल्लाहले पनि नाम परिवर्तन गरेर नागरिकता लिएका छन् । उनले लिएको नागरिकताको नम्बर ०३३–०१–०८१–०४४४१ उल्लेख गरिएको छ ।
