वीरगंज । वीरगंज महानगरपालिकाका प्रमुख राजेशमान सिंहले स्वास्थ्यचौकी भवन निर्माणको शिलान्यास गरेका छन् । वीरगन्ज महानगरपालिका वडा नं.–१२ मुर्ली पोखरी परिसरमा निर्माण हुन लागेको वडा स्वास्थ्य चौकी भवन निर्माणको शिलान्यास गरेका हुन् ।
आगामी अषाढ मसान्तभित्रै निर्माण सम्पन्न गरिसक्ने गरि निर्माण सुरु भएको स्वास्थ्य चौधी भवन निर्माणको सोमबार प्रमुख सिंहले शिलान्यास गरेका हुन् ।
वडा स्वास्थ्य चौकी भाडामा संचालन गर्नु पर्दा निकै कठिनाई भइरहेकाले महानगरपालिकाले स्वास्थ्य चौकी निर्माणको काम अघि बढाएको हो ।
स्वास्थ्य चौकी भवनको शिलान्यास गर्दै महानगर प्रमुख सिंहले गुणस्तरीय स्वास्थ्य सेवा नागरिकको पहुँचमा सहज रुपमा पु¥याउन आफ्नै भवन निर्माणको काम अघि बढाइएको बताए। उनले निर्धारित समयमै गुणस्तरीय काम सम्पन्न गर्न ठेकेदार कम्पनीलाई निर्देशन पनि दिएका छन् ।
महानगरपालिकाले मुर्लीमा ८६ लाख ३६ हजार ६ सय ९६ रुपैयाँको लागतमा निर्माण गर्न लागेको स्वास्थ्य चौकीको ठेक्का दिब्य सूर्योदय आस्था जेभीले सकार गरेको छ । यही असार मसान्तभित्र निर्माण सम्पन्न गर्ने गरी कम्पनीले टेन्डर सकार गरेको हो ।
शिलान्यास कार्यक्रममा वडा नं.– १२ का वडाध्यक्ष सुरेश प्रसाद गुप्ता, वडा नं.– ५ का वडाध्यक्ष प्रदीप चौरसिया, वडा नं.– २३ का वडाध्यक्ष अवधकिशोर प्रसाद कुशवाहा, महानगरका प्रमुख प्रशासकीय अधिकृत मातृका भट्टराई लगायतको सहभागिता रहेको थियो ।
