वीरगन्ज । वीरगन्जको इनरुवामा पाँचहजार वृक्षरोपण गरेर व्यावसायिक कृषि खेतीको शुरुवात गरेका छन् । वीरगन्ज महानगरपालिका वडा नम्बर १६ इनवरुवाका युवा रमेश पटेलले आफ्नो जग्गामा पाँचहजार विरुवाको वृहत वृक्षरोपण गरी व्यावसायिक खेती शुरु गर्नुभएको हो ।
आर्थिक मन्दीले नेपालमा युवाहरु बेरोजगार र निरुत्साहित हुदै बाध्य भएर अन्तिम विकल्पको रुपमा रोजगारीका लागि विदेशिनु परेको अवस्थामा वीरगन्जको ग्रिनसिटी सामुदायिक सेवा केन्द्रको गतिविधिले प्रोत्साहित भई युवा रमेश पटेलले विभिन्न फलफूलका विरुवा रोपेर व्यावसायिक खेती शुरु गर्नुभएको हो ।
नेपालमा बेरोजगारीका कारण युवाहरु बाध्य भएर विदेशिनु नपरोस भन्ने अभिप्रायले ग्रीन सिटी सामुदायिक सेवा केन्द्रका अध्यक्ष जय प्रकाश खेतानले युवाहरुलाई उत्साहित र प्रेरित गरेपछि व्यावसायिक रूपमा रमेशले वृक्षरोपण गर्नुभएको हो ।
वृक्षरोपण कार्यक्रममा बीरगञ्ज महानगरपालिकाका प्रमुख राजेशमान सिंह, प्रमुख प्रशासकीय अधिकृत मातृका भट्टराई, भारतीय वाणिज्य दूतावासका महावाणिज्यदूत देवी सहाय मिणा, नेपाली सेना, सशस्त्र प्रहरी बल, नेपाल प्रहरी लगायत ग्रिनसिटी सामुदायिक सेवा केन्द्रका पदाधिकारी, सञ्चारकर्मीहरुको उपस्थिति रहेको ग्रिनसिटी सामुदायिक सेवा केन्द्रका अध्यक्ष जय प्रकाश खेतानले जानकारी दिनुभयो ।
