वीरगन्ज । धादिङमा घरमा लागेको आगोले जलेर श्रीमान श्रीमतीको मृत्यु भएको छ । जिल्लाको थाक्रे गाउँपालिका–५, गैरीखर्कमा बुधबार राति भएको आगलागीमा परी एक दम्पतीको मृत्यु भएको हो ।
आगोमा जलेर घरभित्रै रहेका ७० वर्षीय तेजबहादुर लामा र उनकी श्रीमती ठूली तामाङको घटनास्थलमै मृत्यु भएको हो ।
रातिको घटना भएकोले सुतिरहेका दम्पत्ती बहिर निस्कन नसक्दा ज्यान गएको हो । प्रहरीले गएराति साढे ११ बजे प्रहरीले आगलागीको खबर पाएको थियो । नजिकको हाप्सेचौर अस्थायी प्रहरी पोष्टबाट प्रहरी टोली पुग्दा घर पूरै जलिरहेको थियो ।
आगलागी राति साढे १२ बजेमात्रै नियन्त्रणमा आएको जिल्ला प्रहरी कार्यालय धादिङका प्रवक्ता मकेन्द्र मिश्रले बताए । वारुणयन्त्र जाने ठाउँ नहुँदा समयमा आगो नियन्त्रणमा सकेको थिएन ।
आगोमा जलेर अन्न, लत्ताकपडा, मकै पिस्ने मेसिन लगायत सबै जलेको छ । धनमाल क्षतिको विवरण संकलनका लागि इन्सपेक्टरको कमाण्डमा प्रहरी टोली खटिएको छ ।
