वीरगन्ज । पर्साको धोबिनी गाउँपालिका वडा नम्बर–४ लँगडीका अभिभावक विहिन दिदीबहिनीको उद्दारका लागि सामाजिक सञ्जाल मार्फत सहयोग संकलन भएको छ । १० बर्षीया प्रियँका कुमारी र ८ बर्षीया मनिषा कुमारीको जीवन गुजाराका लागि धोविनीका स्थानीय युवाहरुले सामाजिक सञ्जाल मार्फत सहयोग संकलन गरेका हुन् ।
पर्साको जगरनाथपुर गाउँपालिका वडा नम्बर ६ घर भएका रामबचन ठाकुर र रमिता ठाकुरबाट जन्मिएका दुई दिदीबहिनी प्रियंका र मनिषा ठाकुरले सानै उमेरमा अभिभावक गुमाउनु प¥यो । रोजगारी खोज्दै भारतको पञ्जाब पुगेका रामबचनको २०७३ सालमा उतै हत्या भयो । बाबुको हत्यापछि आमा रमिताले उनीहरुलाई छोडेर बेपत्ता भईन् ।
बाबुको भारतमा हत्या भएको र आमाले पनि छोडेर बेपत्ता भएपछि उनीहरु बिचल्ली अवस्थामा भेटिएका प्रियंका र मनिषालाई स्थानीयले धोविनी गाउँपालिकाको वडा नम्बर ४ लंगडी स्थित मावली हजुरआमा देवन्ती देवीको ल्याएर छोडिदिएका थिए । उनीहरुको पालनपोषण मावली हजुरआमा देवन्तीले नै गर्दै आएकी थिईन् ।
मावली हजुरआमासँगै बस्दै आएकी प्रियंका र मनिषाको जीवनमा फेरी अर्को बज्रपात भयो । मावली हजुर आमा देवन्ती देवीको पनि ८५ बर्षको उमेरमा फागुन ३ गते निधन भयो । सानैमा बाबु आमा गुमाएका प्रियंका र मनिषाले वृद्धा हजुरआमा पनि गुमाउनु परेपछि उनीहरुको बिचल्ली भएको छ ।
हजुरआमाको अन्तिम संस्कारमा दागबत्ती दिने समेत मान्छे नभएपछि १० बर्षीया प्रियंकाले नै दागबत्ती दिनुप¥यो । सामान्य आर्थिक अवस्था रहेका उनीहरु अभिभावक विहिन भएपछि अहिले प्रियंका र मनिषाको संरक्षणका लागि स्थानीय युवाहरुले सक्रियतामा सामाजिक सञ्जाल मार्फत सहयोगको अपिल गरे ।
सञ्चारकर्मी समेत रहेका राजन कुमार बानियाँ, लालबाबु बानियाँ सहित अन्य युवाहरु प्रदीप पटेल, पिन्टु पटेल, मुन्ना सहनी, राजकिशोर गुप्ता, राजु बनियाँले सामाजिक सञ्जालमा आर्थिक सहयोगको लागि अपिल गरे । त्यसपछि इ–सेवा मार्फत बिचल्लीमा परेका दिदीबहिनी प्रियंका र मनिषाको लागि सहयोग जुट् थाल्यो ।
अभिभावक विहिन भएका उनीहरुको संरक्षणमा स्थानीय तहले खासै चासो देखाएको थिएन । ठाकुर दिदीबहिनीको लागि सामाजिक सञ्जाल फेसमबुक मार्फत नै भएको आर्थिक सहयोग संकलन अभियानमा स्वःस्फुर्त सहयोगहरु जुट्न थाल्यो । सामाजिक सञ्जालमा सहयोगको याचना देखेपछि वीरगन्जको सामाजिक संस्था सानो पाईलाले ठाकुर दिदीबहिनीलाई संरक्षण गर्ने चासो देखायो ।
सानो पाईलाले सामाजिक सञ्जाल फेसबुकमा पोष्ट गर्दै अभिभावक विहिन बनेको ठाकुर दिदीबहिनीलाई संरक्षण गर्ने जानकारी दियो । उनीहरु अहिले हजुर आमाको निधनको शोकमा रहेकाले हजुरआमाको काज क्रियापछि सानोपाईलाले ल्याएर संरक्षण गर्ने सानो पाईलाका कार्यकारी निर्देशक कञ्चन झाले सामाजिक सञ्जाल फेसबुकमा पोष्ट गरे ।
असहाय, बेसाहारा, अशक्त नागरिकहरुको संरक्षण गर्नु स्थानीय तहको सरकारको दायित्व हो । तर, सामाजिक सञ्जालमा सहयोगको यचना गरेको व्यापक भएपनि स्थानीय तहले भने त्यति धेरै चासो लिएन । जब सामाजिक सञ्जालमा भाईरल भएर सामाजिक संस्थाले समेत संरक्षणको चासो देखाएपछि बल्ला धोविनी गाउँपालिकाका प्रमुख प्रशासकीय अधिकृत लगायतको टोली अभिभावक विहिन दिदीबहिनीलाई भेट्न पुगे ।
पीडामा रहेका उनीहरुलाई उनीहरुका नजिकका कसैले पनि वास्ता गरिरहेका थिएनन् । युवाहरुले सामाजिक सञ्जालमा सहयोगको आग्रह सहित पोष्ट गरेपछि सहयोग रकम जुट्न थाल्यो । सामाजिक सञ्जालमा भाइरल हुन थालेपछि धोबिनी गाउँपालिकाका स्थानीय जनप्रतिनिधि चामल, आलु, दाल, तेल लिएर पुगे । नगद २० हजार पनि दिए । पोखरिया नगरपलिका उपप्रमुखले रुबी ठाकुर पनि केही सहयोग लिएर पुगिन् ।
अभिभावक विहिन उनीहरुलाई खाद्यान्न सहितको सामान समेत सहयोग आउन थालेपछि उनीहरुलाई वेवस्ता गर्नेहरु समेत सामान आफ्नो घरतिर राखिदिने भन्दै लैजान खोजेका थिए । स्थानीय तह र सामाजिक संस्थाले चासो लिन थालेपछि अब उनीहरुको संरक्षणका लागि कानूनी प्रकृयाबाटै टुंगो लगाउने तयारी गरिएको सञ्चारकर्मी राजन बानियाँले बताए ।
उनले भने, ‘हामीले इसेवा मार्फत केही रकम संकलन गरेका छौं । सबै आएको रकम जम्मा गरेर दुवै दिदी बहिनको लागि बैंकमा जम्मा गरिदिने छौं । तर, जन्म दर्ता पनि नभएकोले बैंकमा जम्मा गर्न केही प्रकृयामा समस्या भएको छ । जगरनाथपुर गाउँपालिकाका अध्यक्ष श्रीकान्त यादवज्यूले पनि जन्मदर्ता बनाउने आवश्यक पहल गर्ने आश्वासन दिनुभएको छ ।’
जन्मदर्ता बनाएपछि उनीहरुको नाममा बैंकमा पैसा जम्मा गरिदिने राजनले बताए । अन्य सामाजिक संस्थाहरुले पनि प्रियंका र मनिषालाई संरक्षण गर्न चासो देखाएको बताउदै राजनले भने, ‘उनीहरुको सामाजिक गतिविधिको पृष्ठभूमिको आधारमा मात्रै जिम्मा लगाछौं । उनीहरुको भविष्य सुरक्षित र सुरनिश्चित हुने भए मात्रै पठाउछौं । जथाभावी पठाउन पनि भएन ।’
उनका अनुसार सामाजिक सञ्जाल मार्फत नै ३ लाख बराबरको सहयोग रकम संकनल भईसकेको छ । तीनजनाको मोबाईल नम्बरको इ–सेवामा रकम आएका छन् । ती सबै रकम एकठाउँमा जम्मा गर्ने र बैंकमा जम्मा गर्न आवश्यक पहल गर्ने राजनले बताए ।
