वीरगन्ज, १ पुष । वीरगन्ज महानगरपालिकाले निर्माण गरेको सडकलाई लायन्स मार्ग नामाकरण गरिएको छ । अन्तराष्ट्रिय सामाजिक संस्था लायन्स क्लब अफ वीरगन्जको भवनसम्म पुग्ने सडकलाई लायन्स मार्ग नामाकरण गरिएको हो ।
नामाकरणको आईतबार वीरगन्ज महानगरपालिकाका नगर प्रमुख राजेशमान सिंहले उदघाटन गरे । लायन्स क्लब अफ वीरगन्जको स्वर्ण जयन्तिको अवसरमा वीरगन्जको नारायणी अस्पतालदेखि दक्षिणपूर्व लायन्स क्लबको भवनसम्म जाने सडकलाई लायन्स मार्ग नामाकरण गरि उदघाटन गरिएको हो ।
लायन्स क्लबले वीरगन्जमा गरेको विभिन्न सामाजिक कामहरुको प्रशंसा गर्दै महानगर प्रमुख राजेशमान सिंहले महानगर क्षेत्रका विद्यालयहरुको भौतिक पूर्वाधार विकासका लागि पनि आवश्यक सहयोग जुटाउन आग्रह गरे ।
उनले महानगरको एक्लो प्रयासले मात्रै विकास सम्भव नभएको र संघ सरकारले पनि वीरगन्जलाई उपेक्षा गरेको भन्दै लायन्स क्लबका धेरै पदाधिकारीहरुको संघ सरकार र मन्त्रीहरुसँग पनि सम्पर्क हुने भएकोले वीरगन्जको विकासका लागि वीरगन्जलाई विशेष बजेटको व्यावस्थाको पहल गरिदिन आग्रह गरे ।
उनले नेपालको कूल राजस्वको आधा वीरगन्जबाट नै संकलन गर्ने तर वीरगन्जवासीले भने सधैं प्रदूषण मात्रै खानुपर्ने अवस्था रहेकोले त्यो अवस्थाको अन्त्य गर्न सबै वीरगन्जवासी एक भएर संघ सरकारलाई झकझक्याउन आवश्यकता रहेको बताए ।
उनले वीरगन्जको विकासका लागि संघ सरकारले दिएको बजेट पर्याप्त नभएको बताउदै देशका महानगरहरुलाई विनियोजन गर्ने बजेटमा पनि वीरगन्जलाई विभेद गरेको बताए । वीरगन्ज महानगरले पाउने १९२ करोड संघीय बजेटले विकास हुन नसक्ने भन्दै वीरगन्जको विकासका लागि अन्तराष्ट्रिय सामाजिक संस्थाहरुले पनि पहल गर्नुपर्नेमा जोड दिए ।
लायन्स क्लब अफ वीरगन्जका अध्यक्ष पप्पु श्रीवास्तवको अध्यक्षतामा भएको कार्यक्रममा डिष्ट्रिक लायन्स इटरनेशनल–३२५ एसका डिष्ट्रिक गर्भनर डीएन अग्रवाल, पीएमसीसी रमेश अग्रवाल, पूर्व डिष्ट्रिक गभर्नर डा.आरपी खेतान, गोल्डेन जुब्ली कार्यक्रम संयोजक अशोक वैद लगायतले शुभकामना व्यक्त गरेका थिए ।
कार्यक्रमको संचालन लायन्स क्लब अफ वीरगन्जका निवर्तमान अध्यक्ष बलराम श्रेष्ठले गर्नुभएको पूर्व अध्यक्ष छेडुप लामाले जानकारी दिए ।
